യുവന്റ്‌സുമായി കരാര്‍ ഒപ്പിട്ടതിന് പിന്നാലെ റയലില്‍ നിന്നും മറ്റൊരു താരത്തെ ക്ലബിലെത്തിക്കണം എന്ന ആവശ്യവുമായി ക്രിസ്റ്റ്യാനോ. റയലില്‍ ക്രിസ്റ്റിയാനോയുടെ സഹതാരമായിരുന്ന മാഴ്‌സെലോയെ യുവന്റ്‌സിലെത്തിക്കണം എന്നാണ് ക്രിസ്റ്റിയാനോയുടെ ആവശ്യം.
മാഴ്‌സെലോയ്ക്ക് വേണ്ടി ട്രാന്‍സ്ഫര്‍ വിപണിയിലിറങ്ങാന്‍ യുവന്റ്‌സ് ക്ലബ് പ്രസിഡന്റ് അഗ്നെല്ലിയോട് ക്രിസ്റ്റിയാനോ ആവശ്യപ്പെട്ടു കഴിഞ്ഞു എന്നാണ് റിപ്പോര്‍ട്ട. ബെര്‍നാബ്യൂവിലായിരുന്നപ്പോഴുള്ള ബന്ധമാണ് യുവന്റ്‌സിന്റെ റൈറ്റ് ബാക്കായി മാഴ്‌സെലോയെ എത്തിക്കാന്‍ ക്രിസ്റ്റിയാനോയെ പ്രേരിപ്പിക്കുന്നത്.
എന്നാല്‍ മാഴ്‌സെലോയെ വിട്ടുനല്‍കാനുള്ള സൂചനകളൊന്നും റയലിന്റെ ഭാഗത്ത് നിന്നുമുണ്ടായിട്ടില്ല. 2022 വരെയാണ് റയലുമായുള്ള മാഴ്‌സെലോയുടെ കരാര്‍.180 മില്യണ്‍ യൂറോയാണ് റിലീസ് ക്ലോസ്.
മാഴ്‌സെലോ പോയാല്‍ ആ വിടവ് നികത്താന്‍ പാകത്തില്‍ താരങ്ങള്‍ ഇപ്പോള്‍ റയലില്‍ ഇല്ലാത്തതാണ് അവരെ വലയ്ക്കുന്നത്. തിയോ ഹെര്‍ണാന്‍ഡസിലും അവര്‍ക്ക് വിശ്വാസം പോര.
എന്നാല്‍ സീരി എ ചാമ്പ്യന്മാരായ യുവന്റ്‌സിന്റെ കാര്യം അങ്ങിനെയല്ല. അവരുടെ ലെഫ്റ്റ് ബാക്കായ അലക്‌സ് സാന്‍ഡ്രോയെ മാഞ്ചസ്റ്റര്‍ യുനൈറ്റഡിന് വിട്ടു നല്‍കിയാല്‍ മാഴ്‌സെലോയെ ടീമിലെത്തിക്കാനുള്ള വഴി അവര്‍ക്ക് മുന്നിലുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ