ബാങ്കോക്ക്: ഇന്ത്യയുടെ പി.വി സിന്ധുവിന് തായ്‌ലന്‍ഡ് ഓപണ്‍ സൂപ്പര്‍ 500 ബാഡ്മിന്റണ്‍ പോരാട്ടത്തിന്റെ ഫൈനലില്‍ തോല്‍വി. ജപ്പാന്‍ താരം നോസോമി ഒകുഹാരയാണ് സിന്ധുവിനെ പരാജയപ്പെടുത്തി കിരീടം സ്വന്തമാക്കിയത്. 50 മിനുട്ട് നീണ്ട മത്സരത്തില്‍ 15-21, 18-21 എന്ന സ്‌കോറിനാണ് ഇന്ത്യന്‍ താരം പരാജയം സമ്മതിച്ചത്. 

കരിയറില്‍ 11ാം തവണയാണ് ഇരുവരും നേര്‍ക്കുനേര്‍ വന്നത്. ഒകുഹാരയുടെ ആറാം വിജയമാണ് സിന്ധുവിനെതിരേ ഇത്തവണ നേടിയത്. അഞ്ച് ജയങ്ങളാണ് ജപ്പാന്‍ താരത്തിനെതിരേ സിന്ധുവിന്റെ പേരില്‍. ഈ വര്‍ഷം സിന്ധു നേരിടുന്ന മൂന്നാം ഫൈനല്‍ തോല്‍വിയാണിത്. നേരത്തെ ഇന്ത്യ ഓപണ്‍ ഫൈനലില്‍ ബെയ്‌വാന്‍ സാങിനോടും കോമണ്‍വെല്‍ത്ത് ഗെയിംസില്‍ ഇന്ത്യന്‍ താരം തന്നെയായ സൈന നേഹ്‌വാളിനോടും സിന്ധു പരാജയപ്പെട്ടിരുന്നു.