ന്യൂഡല്‍ഹി: ഇന്ത്യയുടെ ഭാരോദ്വഹന താരം സഞ്ജിത ചാനു ഉത്തേജക പരിശോധനയില്‍ പരാജയപ്പെട്ടതായി റിപ്പോര്‍ട്ട്. 
ഓസ്‌ട്രേലിയയിലെ ഗോള്‍ഡ്‌കോസ്റ്റില്‍ നടന്ന കോമണ്‍വെല്‍ത്ത് ഗെയിംസില്‍ ഇന്ത്യയ്ക്ക് സ്വര്‍ണ മെഡല്‍ സമ്മാനിച്ച താരമാണ് സഞ്ജിത ചാനു. ഇതേത്തുടര്‍ന്ന് ചാനുവിന് ഭാഗികമായി വിലക്കേര്‍പ്പെടുത്തി. നാല് വര്‍ഷത്തേക്കാണ് വിലക്ക്.

ഗോള്‍ഡ്‌കോസ്റ്റില്‍ വനിതകളുടെ 53 കിലോഗ്രാം വിഭാഗത്തിലാണ് സഞ്ജിത ചാനു സ്വര്‍ണം നേടിയത്. ഉത്തേജക പരിശോധനയില്‍ പരാജയപ്പെട്ടതോടെ ചാനുവിന്റെ സ്വര്‍ണമെഡല്‍ തിരിച്ചെടുക്കാനും സാധ്യതയുണ്ട്. 

ആകെ 192 കിലോ ഭാരം ഉയര്‍ത്തിയാണ് ചാനു സ്വര്‍ണം സ്വന്തമാക്കിയത്. സ്‌നാച്ചില്‍ 84 കിലോഗ്രാമും ക്ലീന്‍ ആന്‍ഡ് ജെര്‍ക്കില്‍ 108 കിലോഗ്രാം ഭാരവുമാണ് ഗോള്‍ഡ്‌കോസ്റ്റില്‍ ചാനു ഉയര്‍ത്തിയത്. ഇതിനു മുന്‍പു നടന്ന ഗ്ലാസ്‌കോ ഗെയിംസില്‍ വനിതകളുടെ 48 കിലോഗ്രാം വിഭാഗത്തിലും ചാനു സ്വര്‍ണം നേടിയിരുന്നു.