ക്രിക്കറ്റില്‍ നിന്നും ഇടവേള, കബഡിയില്‍ ശ്രദ്ധ വെച്ച് ധോനി
ക്രിക്കറ്റ് മൈതാനത്തെ ധോനിയുടെ ശാന്ത സ്വഭാവം ക്രിക്കറ്റ് ലോകത്തിന് നന്നായി അറിയാം. ഇപ്പോള്‍ കബഡി കളിക്കളത്തില്‍ എത്രമാത്രം ശാന്തനായി കളിക്കാമെന്ന് ആരാധകര്‍ക്ക് കാട്ടിക്കൊടുക്കുകയാണ് ധോനി. പ്രോ കബഡി ലീഗിലാണ് ധോനി കളിക്കളത്തിലിറങ്ങിയത്.
ഓസ്‌ട്രേലിയയ്‌ക്കെതിരായ ട്വന്റി20 പരമ്പരയില്‍ നിന്നും ഒഴിവാക്കപ്പെട്ടതോടെ ക്രിക്കറ്റിലെ ബ്രേക്ക് ആസ്വദിക്കുകയാണ് ധോനി. അതിനിടയിലാണ് കബഡിയില്‍ ഒരു കൈ നോക്കുന്ന ധോനിയുടെ ചിത്രങ്ങള്‍ സമൂഹമാധ്യമങ്ങളില്‍ പ്രത്യക്ഷപ്പെടുന്നത്. പ്രോ കബഡി ലീഗിന്റെ പ്രമൊഷണല്‍ ഷൂട്ടിന് വേണ്ടിയാണ് മുംബൈയില്‍ ധോനി എത്തിയത്.
ക്രിക്കറ്റിലേക്ക് വരുമ്പോള്‍, വിന്‍ഡിസിനും ഓസീസിനും എതിരായ ട്വന്റി20 പരമ്പരകളില്‍ നിന്നും ധോനിയെ ഒഴിവാക്കിയത് വലിയ ബഹളങ്ങള്‍ക്കിടയാക്കിയിരുന്നു. എന്നാല്‍ യുവ താരങ്ങള്‍ക്ക് അവസരം നല്‍കാനുള്ള തീരുമാനം ധോനിയുടെ കൂടി തീരുമാനപ്രകാരമാണ് ഉണ്ടായതെന്ന സൂചനകളാണ് ബിസിസിഐ നല്‍കിയത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ