കൊച്ചി: സ്വന്തം തട്ടകത്തിലെ ആദ്യ ജയം സ്വപ്‌നംകണ്ട് കളിയുടെ അവസാന നിമിഷം വരെ ജയം ഉറപ്പിച്ച് കുതിക്കുകയായിരുന്നു ബ്ലാസ്റ്റേഴ്‌സ്. പക്ഷെ 84-ാം മിനിറ്റില്‍ ക്‌ളോസ് റേഞ്ച് ഹെഡറിലൂടെ ഡല്‍ഹി താരം ആന്‍ഡ്രിജ കാലുജെറോവിക് ബ്ലാസ്‌റ്റേഴ്‌സ് വല ചലിപ്പിച്ചപ്പോള്‍ വീണ്ടുമൊരു സമനിലക്കുരുക്കില്‍ മഞ്ഞപ്പട തളയ്ക്കപ്പെട്ടു. 

ഗോള്‍ രഹിത രണ്ടാം പകുതിക്ക് ശേഷം 48-ാം മിനിറ്റില്‍ മലയാളി താരം സി കെ വിനീത് നേടിയ ഗോളിലൂടെ കളിയില്‍ ബ്ലാസ്‌റ്റേഴ്‌സ് ലീഡ് കുറിച്ചു. വിജയത്തിലേക്ക് നീങ്ങുമെന്നുറപ്പിച്ചെങ്കിലും ഹോം ഗ്രൗണ്ടില്‍ രണ്ടാം മത്സരത്തിലും സമനിലക്കപ്പുറം കടക്കാന്‍ ബ്ലാസ്റ്റേഴ്‌സിനായില്ല. 

ആവേശം ചോര്‍ന്ന ആദ്യ പകുതിക്ക് ശേഷം രണ്ടാം പകുതിയില്‍ ആക്രമിച്ച് കളിച്ച് ബ്ലാസ്റ്റേഴ്‌സ് കളം നിറയുകയായിരുന്നു. ആദ്യ ഗോളിന് പിന്നാലെ തുടര്‍ച്ചയായി ഗോളവസരങ്ങള്‍ സൃഷ്ടിച്ച് ഡല്‍ഹി താരങ്ങളെ വിറപ്പിക്കാന്‍ കേരളത്തിനായി. കളിയിലേക്ക് മടങ്ങിയെത്താനുള്ള ശ്രമങ്ങള്‍ ഡല്‍ഹി തുടര്‍ന്നുകൊണ്ടിരുന്നു. ഒടുവില്‍ പ്രീതം കോട്ടാല്‍ നല്‍കിയ പാസ് ആന്‍ഡ്രിയ കാലുദെറോവിച്ച് വലയിലെത്തിച്ചു. ബ്ലാസ്‌റ്റേഴ്‌സ് 1-1 ഡല്‍ഹി.