ഓസീസ് ക്രിക്കറ്റ് താരം തന്നെ ഒസാമ എന്ന് വിളിച്ചുവെന്ന ഇംഗ്ലണ്ട് താരം മൊയിന്‍ അലിയുടെ വെളിപ്പെടുത്തലില്‍ ഇംഗ്ലണ്ട് ക്രിക്കറ്റ് ബോര്‍ഡില്‍ നിന്നും വിശദീകരണം തേടി ക്രിക്കറ്റ് ഓസ്‌ട്രേലിയ. അടിയന്തരമായി വ്യക്തത വരുത്തണം എന്നാണ് ക്രിക്കറ്റ് ഓസ്‌ട്രേലിയ, ഇംഗ്ലണ്ട് ക്രിക്കറ്റ് ബോര്‍ഡിനോട് നിര്‍ദേശിച്ചിരിക്കുന്നത്.
ഇത്തരം നിലപാടുകള്‍ അംഗീകരിക്കാന്‍ സാധിക്കില്ല. ക്രിക്കറ്റില്‍ ഇതിനൊന്നും സ്ഥാനവുമില്ല. രാജ്യത്തെ പ്രതിനിധീകരിച്ച് ഇറങ്ങുമ്പോള്‍ എങ്ങിനെ പെരുമാറണം എന്നതിന് നമുക്ക് വ്യക്തമായ നിയമമുണ്ട്. മൊയിന്‍ അലിയുടെ വെളിപ്പെടുത്തല്‍ ഗൗരവത്തോടെയാണ് കാണുന്നത് എന്നും ക്രിക്കറ്റ് ഓസ്‌ട്രേലിയ തങ്ങളുടെ പ്രസ്താവനയില്‍ പറയുന്നു.
തന്റെ ആത്മകഥയിലൂടെയായിരുന്നു മൊയിന്‍ അലിയുടെ വിവാദ വെളിപ്പെടുത്തല്‍. 2015ലെ ആഷസ് പരമ്പരയിലെ ആദ്യ ടെസ്റ്റിനിടയില്‍ ഓസീസ് താരം തന്നെ ഒസാമ എന്ന് വിളിക്കുകയായിരുന്നു എന്നാണ് മൊയിന്‍ അലി വെളിപ്പെടുത്തുന്നത്.
എന്നാല്‍ ഈ സംഭവത്തെ കുറിച്ച് ഓസീസ് കോച്ച് ചോദിച്ചപ്പോള്‍ ഈ താരം കള്ളം പറയുകയായിരുന്നു എന്നും ഇംഗ്ലണ്ട് ഓള്‍ റൗണ്ടര്‍ തന്റെ ആത്മകഥയില്‍ പറയുന്നു. കളിക്കളത്ത് പ്രകോപിപ്പിക്കല്‍ എന്ന പേരില്‍ മാന്യതയില്ലാത്ത കളി കളിക്കുന്ന ഓസീസ് ടീമിന് വീണ്ടും തിരിച്ചടിയായിട്ടാണ് മൊയിന്‍ അലിയുടെ പ്രതികരണം വരുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ