മെല്‍ബണ്‍: ഒരറ്റത്ത് വിക്കറ്റ് വീഴുമ്പോഴും മറുവശത്ത് ഉറച്ച് നില്‍ക്കുകയായിരുന്നു ലാബുഷെയ്ന്‍. എന്നാല്‍ ആദ്യ ദിനത്തില്‍ ചായയ്ക്ക് പിരിയുന്നതിന് തൊട്ടു മുന്‍പ് ലാബുഷെയ്ന്‍ കൂടാരം കയറി. അരങ്ങേറ്റക്കാരന്‍ മുഹമ്മദ് സിറാജിന്റെ കന്നി വിക്കറ്റിന് വഴിയൊരുക്കിയത് രഹാനെയുടെ പിഴവുകളില്ലാത്ത ഫീല്‍ഡ് സെറ്റും. 

ചായയ്ക്ക് പിരിയുമ്പോള്‍ 5 വിക്കറ്റ് നഷ്ടത്തില്‍ 136 റണ്‍സ് എന്ന നിലയിലാണ് ഓസ്‌ട്രേലിയ. 132 പന്തില്‍ നിന്ന് 48 റണ്‍സ് എടുത്ത് നില്‍ക്കുമ്പോഴാണ് ലാബുഷെയ്‌നിന്റെ വിക്കറ്റ് വീണത്. അരങ്ങേറ്റക്കാരന്‍ മുഹമ്മദ് സിറാജിന്റെ കരിയറിലെ ആദ്യ വിക്കറ്റ് നേട്ടത്തില്‍ തുണച്ചത് മറ്റൊരു അരങ്ങേറ്റക്കാരനായ ഗില്ലും. ഫുള്ളായി പാഡിന് നേര്‍ക്കെത്തിയ ഡെലിവറിയില്‍ ഫഌക്ക് ചെയ്യാനായിരുന്നു ലാബുഷെയ്‌നിന്റെ ശ്രമം. 

എന്നാല്‍ ലാബുഷെയ്‌നിന്റെ കണക്കുകൂട്ടല്‍ തെറ്റിച്ച് പന്ത് ബാക്ക് വേര്‍ഡ് സ്‌ക്വയര്‍ ലെഗ് ഫീല്‍ഡറുടെ വലത്തേക്ക് എത്തി. പിഴവുകളില്ലാതെ ഗില്‍ ക്യാച്ച് കൈക്കലാക്കുകയും ചെയ്തു. ചായയ്ക്ക് പിരിഞ്ഞപ്പോള്‍ ഇന്ത്യന്‍ ടീമിനെ ഡ്രസിങ് റൂമിലേക്ക് നയിക്കാന്‍ മുന്‍പില്‍ സിറാജിനെയാണ് രഹാനെ നിയോഗിച്ചത്.