മുംബൈ: ഓസ്‌ട്രേലിയക്കെതിരായ ടെസ്റ്റ് പരമ്പരയില്‍ ഇന്ത്യയെ നയിക്കുന്ന രഹാനെയെ കുറിച്ച് ഒന്നും പറയാനില്ലെന്ന് ഇന്ത്യന്‍ മുന്‍ നായകന്‍ സുനില്‍ ഗാവസ്‌കര്‍. മുംബൈ താരങ്ങളെ പുകഴ്ത്തുന്നത് ചൂണ്ടി ആരാധകര്‍ തന്നെ വിമര്‍ശിച്ചേക്കാം എന്നാണ് ഗാവസ്‌കറിന്റെ പരാമര്‍ശം.
കുഞ്ഞിന്റെ ജനനവുമായി ബന്ധപ്പെട്ട് ആദ്യ ടെസ്റ്റിന് പിന്നാലെ ഇന്ത്യയിലേക്ക് കോഹ് ലി മടങ്ങിയതിനെ ഗാവസ്‌കര്‍ വിമര്‍ശിച്ചിരുന്നു. ഇന്ത്യന്‍ ടീമില്‍ രണ്ട് നീതിയാണെന്നുള്‍പ്പെടെയുള്ള ഗാവസ്‌കറിന്റെ വിമര്‍ശനങ്ങള്‍ക്കെതിരെ കോഹ്‌ലിയുടെ ആരാധകരും രംഗത്തെത്തി. ഇതിന് പിന്നാലെയാണ് ഇപ്പോള്‍ ഗാവസ്‌കറിന്റെ പ്രതികരണം വരുന്നത്.
ബോക്‌സിങ് ഡേ ടെസ്റ്റിലെ ആദ്യ ദിനത്തിന് ശേഷം രഹാനെയുടെ ക്യാപ്റ്റന്‍സിയെ കുറിച്ചാണ് ഹര്‍ഷ ഭോഗ്‌ലെ ഗാവസ്‌കറോട് അഭിപ്രായം ആരാഞ്ഞത്. എന്നാല്‍ മുംബൈ താരങ്ങളെ പ്രശംസിക്കുന്നതിന് ആരാധകര്‍ തന്നെ വിമര്‍ശിച്ചേക്കാം എന്ന് പറഞ്ഞ് രഹാനെയുടെ ക്യാപ്റ്റന്‍സിയെ കുറിച്ച് പറയാന്‍ ഗാവസ്‌കര്‍ മടിച്ചു.
രഹാനെയുടെ ക്യാപ്റ്റന്‍സിയെ കുറിച്ച് അധികം സംസാരിക്കാന്‍ ഞാന്‍ ഇല്ല. കാരണം ഞാന്‍ മുംബൈ താരങ്ങളെയാണ് പിന്തുണയ്ക്കകുന്നത് എന്ന് ആളുകള്‍ കുറ്റം പറയും, ഗാവസ്‌കര്‍ പറഞ്ഞു. കോഹ് ലിയെ കുറിച്ചുള്ള പരാമര്‍ശങ്ങളുടെ കാരണം ഇന്ത്യന്‍ നായകനോടുള്ള ഗാവസ്‌കറിന്റെ അസൂയയാണെന്നാണ് ആരാധകരുടെ വിമര്‍ശനം.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ