മുംബൈ: താര ലേലത്തിൽ പങ്കെടുത്ത് ടീമിൽ കൂടുതൽ മാറ്റങ്ങൾ വരുത്തണമോ വേണ്ടയോ എന്ന കാര്യത്തിൽ തീരുമാനമായിട്ടില്ലെന്ന് മുംബൈ ഇന്ത്യൻസ് പരിശീലകൻ മഹേല ജയവർധനെ. മൂന്ന് നാല് ട്രേഡിങ് വിൻഡോകൾ  ഞങ്ങൾക്ക് മുൻപിലുണ്ടെന്നും, ഒരോ വർഷവും കൂടുതൽ വളർന്ന്  സാധ്യതകൾ കൂട്ടുക എന്നതാണ് ലക്ഷ്യമെന്നും ജയവർധനെ പറഞ്ഞു.

ട്രേഡിങ് വിൻഡോയുമായി ബന്ധപ്പെട്ട് കഴിഞ്ഞ 12 വർഷമായി ഉടമകളോടും ഫ്രാഞ്ചൈസിയോടും ബന്ധപ്പെടുന്നുണ്ട്. നേരത്തെ ക്യാംപുകൾ നടത്തി കഴിവുള്ള താരങ്ങളെ കണ്ടെത്താൻ സാധിച്ചിരുന്നു. എവിടെയാണ് മെച്ചപ്പെടേണ്ട മേഖലകൾ എന്ന് നോക്കി അവിടെയുള്ള പിഴവുകൾ നികത്താനാണ് ശ്രമിച്ചിരുന്നത്. എന്നാൽ കോവിഡിനെ തുടർന്ന് പ്ലാനിങ്ങുകൾക്ക് കൂടുതൽ സമയം ലഭിച്ചില്ല. ഈ സാഹചര്യത്തിൽ ട്രേഡിങ് വിൻഡോ പ്രയോജനപ്പെടുത്തുമെന്നും  ജയവർധനെ പറഞ്ഞു. 

2021 സീസണിന് മുൻപായി മെ​ഗാ താര ലേലം നടക്കുമെന്നാണ് സൂചനകൾ. രണ്ട് ഐപിഎൽ ടീമുകളെ കൂടി അടുത്ത സീസണിന് മുൻപായി ടീമിലേക്ക് ഉൾപ്പെടുത്തും എന്നാണ് റിപ്പോർട്ടുകൾ. തുടരെ രണ്ടാം വട്ടം കിരീടം നേടിയ മുംബൈ ടീമിൽ മാറ്റങ്ങൾ വരുത്തി ലേലത്തിന് ഇറങ്ങുമോ എന്നതും ആരാധകർ ഉറ്റുനോക്കുന്ന ഘടകമാണ്.