ദുബായ്‌: ടി20 ലോകകപ്പിന്റെ ഷെഡ്യൂള്‍ പ്രഖ്യാപിച്ചു. ഓസ്‌ട്രേലിയയും സൗത്ത് ആഫ്രിക്കയും തമ്മിലാണ് സൂപ്പര്‍ 12 ഗ്രൂപ്പ് 1ലെ ആദ്യ മത്സരം. ഒക്ടോബര്‍ 23ന് ആണ് ഇത്. അബുദാബിയിലാണ് ഓസീസ്-സൗത്ത് ആഫ്രിക്ക പോര്. 

ഒക്ടോബര്‍ 23ന് നടക്കുന്ന രണ്ടാമത്തെ മത്സരത്തില്‍ വെസ്റ്റ് ഇന്‍ഡീസിനെ ഇംഗ്ലണ്ട് നേരിടും. ദുബായിലാണ് ഇവരുടെ പോര്. ഇന്ത്യയും പാകിസ്ഥാനും തമ്മിലാണ് ഗ്രൂപ്പ് ബിയിലെ ആദ്യ മത്സരം. ഒക്ടോബര്‍ 24ന് ദുബായിലാണ് വൈരികള്‍ പോരിനിറങ്ങുന്നത്.

ഒക്ടോബര്‍ 31ന് ന്യൂസിലാന്‍ഡുമായിട്ടാണ് ഇന്ത്യയുടെ രണ്ടാമത്തെ മത്സരം. നവംബര്‍ മൂന്നിന് നടക്കുന്ന ഇന്ത്യയുടെ മൂന്നാമത്തെ മത്സരത്തില്‍ അഫ്ഗാനിസ്ഥാനെ കോഹ് ലിയും കൂട്ടരും നേരിടും. റൗണ്ട് വണ്ണില്‍ നിന്ന് യോഗ്യത നേടിയെത്തുന്ന ടീമിനെയാണ് നവംബര്‍ അഞ്ചിന് ഇന്ത്യ നേരിടുക. 

നവംബര്‍ 10ന് അബുദാബിയിലാണ് ആദ്യ സെമി ഫൈനല്‍. നവംബര്‍ 11ന് ദുബായില്‍ രണ്ടാമത്തെ സെമി ഫൈനലും. രണ്ട് സെമി ഫൈനലിനും റിസര്‍വ് ഡേയുണ്ട്. നവംബര്‍ 14നാണ് കലാശപ്പോര്. ദുബായില്‍ പ്രാദേശിക സമയം 6നാണ് മത്സരം. തിങ്കളാഴ്ചയാണ് ഫൈനലിന്റെ റിസര്‍വ് ഡേ.