പാരിസ്: ഫ്രഞ്ച് ലീഗ് വമ്പന്മാരുടെ പരിശീലക സ്ഥാനത്തേക്ക് എത്തി ആഴ്ചകള്‍ പിന്നിടും മുന്‍പ് കിരീടം ഉയര്‍ത്തി മൗറീസ്യോ പൊച്ചറ്റീനോ. ചിരവൈരികളായ മാഴ്‌സെല്ലെയെ 2-1ന് തകര്‍ത്താണ് പിഎസ്ജി ചാമ്പ്യന്‍സ് ട്രോഫി കിരീടം പിടിച്ചു. 

ആദ്യ പകുതിയില്‍ ഇക്കാര്‍ഡിയുടെ ഗോളിലൂടെ മുന്‍പിലെത്തിയെങ്കിലും 85ാം മിനിറ്റിലെ നെയ്മറുടെ പെനാല്‍റ്റിയാണ് ജയം പിടിക്കാന്‍ പിഎസ്ജിയെ തുണച്ചത്. ഡിസംബര്‍ 13ന് ലീഗ് വണ്ണിലെ മത്സരത്തില്‍ പരിക്കേറ്റ് പുറത്തേക്ക് പോയതിന് ശേഷം നെയ്മര്‍ ഗോളോടെ തിരിച്ചെത്തിയതും പിഎസ്ജിക്ക് കരുത്തേകുന്നു. 

സൂപ്പര്‍ കപ്പിന് സമാനമായ ചാമ്പ്യന്‍സ് ട്രോഫി. ഫ്രഞ്ച് കപ്പ് ജേതാക്കളും, ലീഗ് ചാമ്പ്യന്മാരുമാണ് ചാമ്പ്യന്‍സ് ട്രോഫിയില്‍ പോരിനിറങ്ങുന്നത്. കഴിഞ്ഞ രണ്ട് സീസണുകളും ജയിച്ച് പിഎസ്ജി എത്തിയപ്പോള്‍ ലീഗ് വണ്‍ റണ്ണേഴ്‌സ് അപ്പായാണ് മാഴ്‌സെല്ലേ ഇറങ്ങിയത്. 

ഫൈനലിലെ 22ാം മിനിറ്റില്‍ ഇക്കാര്‍ഡി പിഎസ്ജിയെ മുന്‍പിലെത്തിച്ചു എന്ന് തോന്നിച്ചെങ്കിലും എംബാപ്പെ ഓഫ്‌സൈഡില്‍ കുടുങ്ങിയത് തിരിച്ചടിയായി. എന്നാല്‍ 39ാം മിനിറ്റില്‍ സ്റ്റീവന്റെ ഹെഡര്‍ ഗോള്‍വല കുലുക്കാതെ പുറത്തേക്ക് എത്തിയപ്പോള്‍ ഇക്കാര്‍ഡി തിരികെ ഗോള്‍വലയിലേക്ക് എത്തിച്ചു. 

65ാം മിനിറ്റിലാണ് നെയ്മര്‍ കളിക്കാനിറങ്ങിയത്. വന്നപാടെ അര്‍ജന്റീനിയന്‍ താരം ഗോണ്‍സാലെസ് നെയ്മറെ ഫൗള്‍ ചെയ്തു. ഒടുവില്‍ ഇക്കാര്‍ഡിയെ ഫൗള്‍ ചെയ്തതിന് ലഭിച്ച പെനാല്‍റ്റിയാണ് നെയ്മര്‍ പിഴവുകളില്ലാതെ വലയ്ക്കകത്തേക്ക് കടത്തിയത്. 89ാം മിനിറ്റില്‍ പേയെറ്റ് മാഴ്‌സെല്ലേയ്ക്കായി ഗോള്‍ വല കുലുക്കിയെങ്കിലും കാര്യമുണ്ടായില്ല.