ന്യൂഡല്‍ഹി: ഇംഗ്ലണ്ടിലെ രണ്ട് ഇന്ത്യന്‍ താരങ്ങളുടെ പ്രകടനം വിസ്മരിക്കാന്‍ കഴിയില്ലെന്ന് മുന്‍ ഇന്ത്യന്‍ താരം വീരേന്ദര്‍ സെവാഗ്. ഇന്ത്യന്‍ ഓപ്പണര്‍മാരായ രോഹിത് ശര്‍മ, കെ എല്‍ രാഹുല്‍ എന്നിവരിലേക്കാണ് സെവാഗ് വിരല്‍ ചൂണ്ടുന്നത്. 

ഇവര്‍ രണ്ട് പേരുടേയും കൂട്ടുകെട്ട് ഇല്ലായിരുന്നു എങ്കില്‍ സ്‌കോര്‍ കണ്ടെത്താന്‍ പ്രയാസപ്പെടുന്ന മധ്യനിര നേരത്തെ മടങ്ങുകയും ഇന്ത്യ പെട്ടെന്ന് തന്നെ ഓള്‍ഔട്ട് ആവുകയും ചെയ്യുമായിരുന്നു. മധ്യനിര ഫോമിലല്ലായിരുന്നു എങ്കിലും ശക്തമായ നിലയില്‍ ഇന്ത്യ എത്താന്‍ കാരം ഓപ്പണര്‍മാരാണ് എന്നും സെവാഗ് ചൂണ്ടിക്കാണിച്ചു. 

രാഹുലിന്റേയും രോഹിത്തിന്റേയുമായിരുന്നു ഇംഗ്ലണ്ടിലെ മികച്ച കൂട്ടുകെട്ട്. ലോര്‍ഡ്‌സില്‍ സെഞ്ചുറി കൂട്ടുകെട്ടും നോട്ടിങ്ഹാമിലും ഓവലിലും അര്‍ധ സെഞ്ചുറി കൂട്ടുകെട്ടും ഇവര്‍ കണ്ടെത്തിയിരുന്നു. നാല് ടെസ്റ്റില്‍ നിന്ന് 368 റണ്‍സ് ആണ് രോഹിത് നേടിയത്. 315 റണ്‍സ് ആണ് രാഹുല്‍ നേടിയത്. 

രണ്ട് മത്സരങ്ങള്‍ മാത്രമാണ് കളിച്ചത് എങ്കിലും ഏഴ് വിക്കറ്റും 117 റണ്‍സും കണ്ടെത്തി തന്റെ കഴിവ് ശാര്‍ദുല്‍ താക്കൂറും തെളിയിച്ചു. 18 വിക്കറ്റാണ് നാല് ടെസ്റ്റില്‍ നിന്ന് ബൂമ്ര വീഴ്ത്തിയത്. മുഹമ്മദ് സിറാജ് 11 വിക്കറ്റും ഷമി 11 വിക്കറ്റും വീഴ്ത്തി.