തിരുവനന്തപുരം: ഓഖി ദുരന്തത്തില്‍ പെട്ട് കടലില്‍ ജീവന്‍ നഷ്ടപ്പെട്ടവര്‍ക്കും തിരികെയെത്താത്തവര്‍ക്കും വേണ്ടി കടലില്‍ നിന്ന് തിരിച്ചെത്തിയവര്‍ ക്രിസ്മസ് സായാഹ്നത്തില്‍ ശംഖുമുഖത്ത് മെഴുക് തിരി കൊളുത്തും. വൈകുനനേരം ആറ് മണിക്കാണ് പരിപാടിയെന്ന് മത്സ്യത്തൊഴിലാളി നേതാവ് റ്റി. പീറ്റര്‍ അറിയിച്ചു.കേന്ദ്രസര്‍ക്കാരിന്റെ കണക്കുകള്‍ പ്രകാരം ഓഖി ദുരന്തത്തില്‍ ഇതുവരെ മരിച്ചവരുടെ എണ്ണം 74 ആണ്. ഇനിയും തിരിച്ചെത്താത്തവരുടെ എണ്ണം 215ഉം. നിലവില്‍ മത്സ്യത്തൊഴിലാളികളുടെ ബോട്ടുകള്‍ക്ക് പുറമേ പ്രതിരോധ സേനയും 18 കപ്പലുകളും തെരച്ചില്‍ നടത്തുന്നുണ്ട്. ഇതില്‍ക്കൂടുതല്‍ പേര്‍ കടലില്‍ അകപ്പെട്ടിട്ടുണ്ടെന്നാണ് ലത്തീന്‍ സഭ പറയുന്നത്.  ഏറ്റവും കൂടുതല്‍പേര്‍ കൊല്ലപ്പെട്ടതും കാണാതായതും തിരുവനന്തപുരം ജില്ലയിലെ തീരപ്രദേശങ്ങളില്‍ നിന്നാണ്. 

ഓഖി ദുരന്തത്തെ ദേശീയ ദുരന്തമായി പ്രഖ്യാപിക്കില്ലെന്നാണ് കേന്ദ്രസര്‍ക്കാരിന്റെ നിലപാട്. ദുരന്തത്തെ ദേശീയ ദുരന്ത പാക്കേജില്‍ ഉള്‍പ്പെടുത്തി കൂടുതല്‍ ദുരിതാശ്വാസ പാക്കേജ് അനുവദിക്കണം എന്ന സംസ്ഥാന സര്‍ക്കാരിന്റെ ആവശ്യം കേന്ദ്രം അംഗീകരിച്ചിട്ടില്ല.