തിരുവനന്തപുരം: സ്വാശ്രയ എംബിബിഎസ് കോഴ്‌സ് ഫീസ് സര്‍ക്കാര്‍ നിശ്ചയിച്ചു. 85 ശതമാനം സീറ്റുകളില്‍ 5.5 ലക്ഷം രൂപയും എന്‍ആര്‍ഐ സീറ്റിന് 20 ലക്ഷം രൂപയുമാണ് ഫീസ് നിരക്ക്. പത്തുലക്ഷത്തിനും പതിനഞ്ച് ലക്ഷത്തിനും ഇടയില്‍ ഫീസ് വേണമെന്നതായിരുന്നു സ്വകാര്യമാനേജ്‌മെന്റുകളുടെ ആവശ്യം. ഫീസ് നിര്‍ണയ സമിതിയാണ് ഫീസ് നിര്‍ണയിച്ചത്.

ഫീസ് നിശ്ചയിച്ചതിലൂടെ സംസ്ഥാനത്തെ എല്ലാ സ്വാശ്രയകോളേജുകളിലും ഒരേ ഫീസ് നിരക്ക് നിലവില്‍ വരും. എന്നാല്‍ സര്‍ക്കാരിന്റെ നിലപാടിനെതിരെ മാനേജുമെന്റ് അസോസിയേഷന്‍ കോടതിയെ സമീപിക്കുമെന്നാണ് മാനേജ്‌മെന്റുകളുടെ അഭിപ്രായം. ഫീസ് ഏകീകരണത്തില്‍ മാനേജ്‌മെന്റുകള്‍ക്ക് ഏകാഭിപ്രായം ഇല്ലാത്തതുമാണ് ഫീസ് നിര്‍ണയസമിതി ഇത്തരം തീരുമാനത്തിലേക്ക് എത്തിയത് മാത്രമല്ല കൃസ്ത്യന്‍ മാനേജുമെന്റുകള്‍ വാങ്ങുന്ന ഫീസ് നിരക്കില്‍ തന്നെ മറ്റുകോളേജുകള്‍ക്കും മുന്നോട്ട് പോകാനാകുമെന്നും വിലയിരുത്തിയതിന്റെ അടിസ്ഥാനത്തിലാണ് ഫീസ് നിശ്ചയിച്ചത്.

അതേസമയം സര്‍ക്കാരിന്റെ നടപടിക്കെതിരെ നാളെ ഹൈക്കോടതിയെ സമീപിക്കുമെന്ന് ഫസല്‍ ഗഫൂര്‍ വ്യക്തമാക്കി. വേണ്ടത്ര പഠിക്കാതെയാണ് ഫീസ് നിര്‍ണയിച്ചതെന്നും കഴിഞ്ഞ തവണത്ത ഫീസ് നിരക്കെങ്കിലും നിശ്ചയിക്കാന്‍ സര്‍്ക്കാര്‍ തയ്യാറാകണമായിരുന്നെന്നും ഫസല്‍ ഗഫൂര്‍ പറഞ്ഞു.