കൊച്ചി : കേരള വാട്ടര്‍ അതോറിറ്റി മാനേജിങ് ഡയറക്ടര്‍ എ ഷൈനമോള്‍ ഐഎഎസിന് അറസ്റ്റ് വാറണ്ട്. കോടതി അലക്ഷ്യ കേസിലാണ് ഷൈനമോള്‍ക്ക് ഹൈക്കോടതി അറസ്റ്റ് വാറണ്ട് പുറപ്പെടുവിച്ചത്. കേന്ദ്ര സര്‍ക്കാര്‍ സ്ഥാപനമായ എഞ്ചിനീറിംഗ് പ്രോജക്ട്‌സ് ഇന്ത്യ ലിമിറ്റഡ് എന്ന സ്ഥാപനം നല്‍കിയ കോടതി അലക്ഷ്യ ഹര്‍ജിയിലാണ് ഹൈക്കോടതി ഡിവിഷന്‍ ബെഞ്ചിന്റെ
നടപടി.
ഷൈനാമോള്‍ക്കെതിരെയുള്ള കോടതി അലക്ഷ്യം നിലനില്‍ക്കുന്നതാണെന്ന് ബോധ്യപ്പെട്ട ഡിവിഷന്‍ ബെഞ്ച് ഇന്ന് നേരിട്ട് ഹാജരായി വിശദീകരണം നല്‍കണമെന്ന് ഉത്തരവിട്ടിരുന്നു. എന്നാല്‍ ഷൈനമോള്‍ ഇന്ന് കോടതിയില്‍ ഹാജരായില്ല. ഈ സാഹചര്യത്തിലാണ് കോടതി അറസ്‌ററ് വാറണ്ട് പുറപ്പെടുവിച്ചത്.
ജല അതോറിറ്റിക്ക് വേണ്ടി കമ്പനി നിര്‍വഹിച്ച ജോലികളുടെ ചിലവിനത്തില്‍ അധികം വന്ന തുക കമ്പനിക്ക് നല്‍കണമെന്ന് സിംഗിള്‍ ബെഞ്ച് ഉത്തരവിട്ടിരുന്നു. ഇതിനെതിരെ വാട്ടര്‍ അതോറിറ്റി നല്‍കിയ അപ്പീല്‍ ഡിവിഷന്‍ ബെഞ്ച് തള്ളി. എന്നിട്ടും തുക നല്‍കാതിരുന്ന സാഹചര്യത്തിലാണ് ജല അതോറിറ്റിക്കെതിരെ കമ്പനി കോടതി അലക്ഷ്യ ഹര്‍ജി നല്‍കിയത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ