തിരുവനന്തപുരം : സോളാര്‍ റിപ്പോര്‍ട്ടിന്മേലുളള തുടര്‍നടപടിയില്‍ ആര്‍ക്കും വെപ്രാളം വേണ്ടെന്ന് മുഖ്യമന്ത്രി പിണറായി വിജയന്‍. സോളാര്‍ റിപ്പോര്‍ട്ടിന്മേല്‍ തുടര്‍നപടി സ്വീകരിക്കാന്‍ സര്‍ക്കാരിന് ബാധ്യതയുണ്ട്. അത് എന്താണോ അത് ഈ സര്‍ക്കാര്‍ സ്വീകരിക്കും. അതില്‍ ആരും വെപ്രാളപ്പെടേണ്ടത് ഇല്ലെന്നായിരുന്നു പിണറായി വിജയന്റെ പ്രതികരണം.
സോളാര്‍ കേസില്‍ എല്‍ഡിഎഫ് സമരത്തെ തുടര്‍ന്നാണ് അന്നത്തെ മുഖ്യമന്ത്രി ഉമ്മന്‍ ചാണ്ടി ജുഡിഷ്യല്‍ കമ്മീഷന്‍ അന്വേഷണം പ്രഖാപിച്ചത്. ആവശ്യമായ സമയം എടുത്ത ശേഷമാണ് കമ്മീഷന്‍ സര്‍ക്കാരിന് റിപ്പോര്‍ട്ട് സമര്‍പ്പിച്ചത്. ആ റിപ്പോര്‍ട്ടിന്മേലുളള നിയമപരമായ നടപടിയാണ് സര്‍ക്കാര്‍ സ്വീകരിക്കുന്നതെന്നും പിണറായി പറഞ്ഞു. കാനം രാജേന്ദ്രന്‍ നയിക്കുന്ന എല്‍ഡിഎഫ് ജാഥ ഉദ്ഘാടനം ചെയ്യവേയാണ് പിണറായിയുടെ പ്രതികരണം.
അതേസമയം സോളാര്‍ കേസ് നിയമപരമായും രാഷ്ടീയമായും നേരിടാനാണ് കോണ്‍ഗ്രസ് രാഷ്ട്രീയ കാര്യസമിതിയുടെ തീരുമാനം. എന്നാല്‍ കേസ് രാഷ്ട്രീയമായി നേരിടേണ്ടതില്ലെന്നും നിയമപരമായി നേരിട്ടാല്‍ മതിയെന്നുമായിരുന്നു വി എം സുധീരന്റെ നിലപാട്. സമരത്തിന് പകരം പ്രതിഷേധ പ്രചാരണവുമായി മുന്നോട്ടുപോകാനാണ് കോണ്‍ഗ്രസിന്റെ തീരുമാനം. ഇതിന് പിന്നാലെയാണ് പിണറായിയുടെ വിശദീകരണം.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ