കൊച്ചി: നടിയെ ആക്രമിച്ച കേസില്‍ അന്വേഷണം സിനിമാ തിരക്കഥ പോലെയാണോയെന്ന് ഹൈക്കോടതി. അന്വേഷണം അനന്തമായി നീളുകയാണോയെന്ന് കോടതി പൊലീസിനോട് ആരാഞ്ഞു. സംവിധായകന്‍ നാദിര്‍ഷായുടെ മുന്‍കൂര്‍ ജാമ്യാപേക്ഷ പരിഗണിക്കുമ്പോഴായിരുന്നു കോടതിയുടെ പരാമര്‍ശം.
കേസില്‍ അന്വേഷണം എന്നു തീരുമെന്ന് ആരാഞ്ഞ ഹൈക്കോടതി പ്രതികളെ വീണ്ടും വീണ്ടും ചോദ്യം ചെയ്യുകയാണോയെന്ന് സംശയം പ്രകടിപ്പിച്ചു. ആരെയെങ്കിലും തൃപ്തിപ്പെടുത്താനാണോ ഇത്? ഓരോ മാസവും ഓരോ പ്രതിയെ ചോദ്യം ചെയ്യുകയാണോ? സുനിലിനെ ചോദ്യം ചെയ്യുന്നത് വാര്‍ത്ത സൃഷ്ടിക്കാനാണോ? വാര്‍ത്തയുണ്ടാക്കാന്‍ വേണ്ടി കൂടുതല്‍ അന്വേഷണം വേണ്ട. വാര്‍ത്തകള്‍ പരിധി വിട്ടാല്‍ ഇടപെടുമെന്ന് കോടതി മുന്നറിയിപ്പു നല്‍കി.
അന്വേഷണം രണ്ടാഴ്ചയ്ക്കകം തീരുമെന്ന് ഡയറക്ടര്‍ ജനറല്‍ ഒഫ് പ്രോസിക്യൂഷന്‍ കോടതിയില്‍ മറുപടി നല്‍കി. നാദിര്‍ഷയെ കേസില്‍ പ്രതിചേര്‍ത്തിട്ടില്ലെന്നും ഡിജിപി പറഞ്ഞു. നാദിര്‍ഷയുടെ മുന്‍കൂര്‍ ജാമ്യാപേക്ഷ 18ലേക്കു മാറ്റിയ കോടതി വെള്ളിയാഴ്ച ചോദ്യം ചെയ്യലിനു ഹാജരാകാന്‍ നാദിര്‍ഷയ്ക്കു നിര്‍ദേശം നല്‍കി.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ