പ്രളയക്കെടുതിയില്‍ അകപ്പെട്ടവരെ സഹായിക്കാന്‍ ആരംഭിച്ച മുഖ്യമന്ത്രിയുടെ ദുരിതാശ്വാസ നിധിയിലേക്ക് നടി അനുപമ പരമേശ്വരനും തെലുങ്ക് യുവതാരം വിജയ് ദേവരക്കൊണ്ടയും സംഭാവന നൽകി. വിജയ് അഞ്ച് ലക്ഷം രൂപയും അനുപമ ഒരു ലക്ഷം രൂപയുമാണ് സംഭാവന ചെയ്തത്. 

കേരളം തന്‍റെ സിനിമകളെ പ്രോത്സാഹിപ്പിച്ച സ്ഥലമാണെന്നും അവിടെ പരിചയപ്പെട്ട ആളുകളിൽ നിന്ന് ഒരുപാട് സ്നേഹം ലഭിച്ചിട്ടുണ്ടെന്നും വിജയ് തന്റെ ട്വിറ്റർ പോസ്റ്റിൽ അറിയിച്ചിരുന്നു. ഓരോരുത്തരും തങ്ങളാലാവുന്ന വിധത്തിൽ ദുരിതാശ്വാസ നിധിയിലേക്ക് സംഭാവന ചെയ്യണമെന്നും താരം അഭ്യർത്ഥിച്ചു.

നേരത്തെ മലയാളത്തിലെ സൂപ്പർതാരങ്ങളായ മമ്മൂട്ടിയും മോഹൻലാലും പ്രളയബാധിതർക്ക് 25 ലക്ഷം രൂപ സംഭാവന ചെയ്തിരുന്നു. കമലഹാസൻ, ദുൽഖർ, സൂര്യ, കാർത്തിക് തുടങ്ങിയവരും സഹായഹസ്തവുമായി എത്തിയിരുന്നു. 

താരസംഘടനയായ അമ്മയുടെ നേതൃത്വത്തില്‍ ദുരിതാശ്വാസ നിധിയിലേക്ക് ആദ്യ ഘട്ട സഹായമായി പത്ത് ലക്ഷം രൂപ നല്‍കുകയുണ്ടായി. തമിഴ്നാട്ടിലെ സിനിമ പ്രവര്‍ത്തകരുടെ സംഘടനയായ നടികര്‍ സംഘവും കേരളത്തിന് സഹായമെത്തിക്കാനുള്ള ശ്രമത്തിലാണ്.