പാലക്കാട് : ലൈംഗികപീഡന ആരോപണ വിധേയനായ പി കെ ശശി എംഎല്‍എ പങ്കെടുക്കുന്ന ചടങ്ങില്‍ നിന്നും സാഹിത്യകാരന്‍ എം ടി വാസുദേവന്‍ നായര്‍ പിന്മാറി. സര്‍ക്കാരിന്റെ സര്‍ഗവിദ്യാലയം പരിപാടിയുടെ സംസ്ഥാന തല ഉദ്ഘാടന പരിപാടിയില്‍ നിന്നാണ് എംടി പിന്മാറിയത്. ആരോപണ വിധേയനായ ശശിക്കൊപ്പം വേദി പങ്കിടുന്നതിലുള്ള വൈമുഖ്യമാണ് പിന്മാറ്റത്തിന് കാരണമെന്നാണ് സൂചന.
വെള്ളിനേഴി ഹയര്‍സെക്കന്‍ഡറി സ്‌കൂളിലാണ് പരിപാടിയുടെ ഉദ്ഘാടനം നടക്കുന്നത്. പികെ ശശിയാണ് പരിപാടിയുടെ അധ്യക്ഷന്‍. സര്‍ഗ വിദ്യാലയത്തിന്റെ ഉദ്ഘാടനം എംടിയാണ് നിര്‍വഹിക്കേണ്ടിയിരുന്നത്. പ്രവര്‍ത്തനോദ്ഘാടനം മന്ത്രി സി രവീന്ദ്രനാഥും നിര്‍വഹിക്കുമെന്നാണ് അറിയിച്ചിരുന്നത്.
പരാപാടിയില്‍ പങ്കെടുക്കില്ലെന്നും, ഇക്കാര്യം പരിപാടിയുടെ സംഘാടകരെ അറിയിച്ചതായും എംടി വാസുദേവന്‍ നായര്‍ അറിയിച്ചു. വ്യക്തിപരമായ കാരണങ്ങളാലാണ് പിന്മാറുന്നതെന്നാണ് എംടി സംഘാടകരെ അറിയിച്ചിട്ടുള്ളത്. പീഡന ആരോപണ വിധേയനൊപ്പം വേദി പങ്കിടുന്നതിനെതിരെ എംടിക്ക് നിരവധി കത്തുകള്‍ ലഭിച്ചിരുന്നു. ഇതിന്റെ പശ്ചാത്തലത്തിലാണ് പൊടുന്നനേയുള്ള പിന്മാറ്റമെന്നാണ് വിലയിരുത്തല്‍.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ