തിരുവനന്തപുരം: സി പി ഐ എം പാര്‍ട്ടി സംസ്ഥാന സെക്രട്ടറി കോടിയേരി ബാലകൃഷ്ണന്റെ മകന്‍ ബിനോയ് കോടികളുടെ സാമ്പത്തിക തട്ടിപ്പ് നടത്തിയെന്ന ആരോപണത്തിന് പിന്നാലെ സഹോദരന്‍ ബിനീഷ് കോടിയേരിക്കെതിരെയും ആരോപണം. ദുബായില്‍ ബിനീഷ് കോടിയേരിക്കെതിരെ വഞ്ചനാകുറ്റത്തിന് കേസുളളതായി കോടതി രേഖകള്‍ ചൂണ്ടികാണിക്കുന്നതായി മനോരമ റിപ്പോര്‍ട്ട് ചെയ്യുന്നു. മൂന്ന് വര്‍ഷത്തിനിടെ മൂന്നുകേസുകള്‍ ബിനീഷിനെതിരെ രജിസ്റ്റര്‍ ചെയ്തു. ഒരു കേസില്‍ ബിനീഷിനെ രണ്ടുമാസം തടവിന് ശിക്ഷിച്ചു.
ദുബായിലെ മൂന്നുപൊലീസ് സ്റ്റേഷനുകളിലാണ് ബിനീഷ് കോടിയേരിക്കെതിരെ കേസുകള്‍ രജിസ്റ്റര്‍ ചെയ്തിട്ടുളളത്. രണ്ടേകാല്‍ ലക്ഷം രൂപയുടെ തട്ടിപ്പ് നടത്തിയതായി കാണിച്ച് ഒരു സ്വകാര്യ കമ്പനി നല്‍കിയ പരാതിയിലാണ് ബിനിഷിനെ രണ്ടുമാസത്തെ തടവിന് ശിക്ഷിച്ചിട്ടുളളത്. 2015ല്‍ രജിസ്റ്റര്‍ ചെയ്ത ഈ കേസില്‍ കഴിഞ്ഞ ഡിസംബറിലാണ് കോടതി ശിക്ഷ വിധിച്ചത്.
ബിനോയിക്കെതിരായ കേസ് അന്വേഷിക്കാത്തത് സംശയാസ്പദമാണെന്ന് നിയമസഭയില്‍ അടിയന്തര പ്രമേയത്തിന് അനുമതി തേടി സംസാരിച്ച അനില്‍ അക്കര ചൂണ്ടികാണിച്ചിരുന്നു. തെളിവുകളുടെ അടിസ്ഥാനത്തിലാണ് ആരോപണമുന്നയിച്ചതെന്നു പറഞ്ഞ അനില്‍ അക്കര കോടിയേരിയുടെ മക്കളായ ബിനോയ് കോടിയേരിയും ബിനീഷ് കോടിയേരിയും നടത്തുന്ന തട്ടിപ്പുകളെക്കുറിച്ച് അന്വേഷിക്കണമെന്നും ആവശ്യപ്പെട്ടു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ