ഇടുക്കി: സിപിഐ മന്ത്രിമാര്‍ക്കെതിരെ രൂക്ഷ വിമര്‍ശനവുമായി പാര്‍ട്ടി ഇടുക്കി ജില്ലാ സമ്മേളനം. നാല് മന്ത്രിമാര്‍ക്കുമെതിരെ കടുത്ത വിമര്‍ശനങ്ങളാണ് സമ്മേളന പ്രതിനിധികള്‍ ഉയര്‍ത്തിയിരിക്കുന്നത്. കൃഷി വകുപ്പ് മന്ത്രി വി.എസ് സുനില്‍ കുമാറിനെ മണ്ഡരി ബാധിച്ച തെങ്ങെന്ന് വിളിച്ചപ്പോള്‍ റവന്യു മന്ത്രി ഇ.ചന്ദ്രഖേരനെ വാ പോയ കോടാലിയുമായാണ് ഉമിച്ചത്. വനം വകുപ്പ് സമാന്തര സര്‍ക്കാര്‍ നടത്തുന്നുവെന്നും ജോയിന്റ് കൗണ്‍സിലാണ് വനം വകുപ്പ് ഭരിക്കുന്നതെന്നും ആരോപണമുയര്‍ന്നു.
നേരത്തെ തിരുവനന്തപുരം ജില്ലാ സമ്മേളനത്തിലും മന്ത്രിമാര്‍ക്കെതിരെ കടുത്ത വിമര്‍ശനങ്ങള്‍ ഉയര്‍ന്നിരുന്നു. സിപിഐ മന്ത്രിമാര്‍ പൊതിക്കാത്ത തേങ്ങ മുന്നില്‍ കണ്ട പട്ടികളെപ്പോലെയാണ് എന്നാണ് അന്ന് വിമര്‍ശനം ഉയര്‍ന്നിരുന്നത്. ഭക്ഷ്യമന്ത്രി പി.തിലോത്തമനെ മാറ്റണമെന്നും ആവശ്യമുയര്‍ന്നിരുന്നു. തിലോത്തമന്‍ സി.ദിവാകരന് ചീത്തപ്പേരുണ്ടാക്കുന്നുവെന്നാണ് ആരോപണം ഉയര്‍ന്നത്. ഇ.ചന്ദ്രശേഖരന്റെ കടിഞ്ഞാണ്‍ മുഖ്യമന്ത്രി പിണറായി വിജയന്റെ കയ്യിലാണെന്നും തിരുവനന്തപുരം സമ്മേളനത്തില്‍ ആക്ഷേപമുയര്‍ന്നിരുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ