കോഴിക്കോട്: ടിപി ചന്ദ്രശേഖരന് വധക്കേസ് അന്വേഷണത്തില് ഒത്തുതീര്പ്പുണ്ടായിട്ടുണ്ടെന്ന പ്രസ്താവനയെക്കുറിച്ച് ക്രൈംബ്രാഞ്ച് വിടി ബല്റാം എംഎല്എയില്നിന്ന് മൊഴിയെടുത്തു. കോഴിക്കോട് ക്രൈം ബ്രാഞ്ച് ഓഫിസില് വച്ചായിരുന്നു മൊഴിയെടുക്കല്.
ടിപി ചന്ദ്രശേഖരന് കൊലപാതകത്തിന്റെ പുറകിലെ ഗൂഡാലോചനക്കേസ് നേരാംവണ്ണം അന്വേഷിച്ച് മുന്നോട്ടുകൊണ്ടുപോകാതെ ഇടക്കുവെച്ച് ഒത്തുതീര്പ്പുണ്ടാക്കുകയാണ് കോണ്ഗ്രസ് നേതാക്കള് ചെയ്തതെന്ന് വിടി ബല്റാം നേരത്തെ അഭിപ്രായപ്പെട്ടിരുന്നു. അതിനു കിട്ടിയ പ്രതിഫലമായി സോളാര് കേസിലെ സര്ക്കാര് നടപടിയെ കണക്കാക്കിയാല് മതിയെന്നുമായിരുന്നു ബല്റാം പറഞ്ഞത്. ഇനിയെങ്കിലും അഡ്ജസ്റ്റ്മെന്റ് രാഷ്ട്രീയം അവസാനിപ്പിക്കുകയാണ് കോണ്ഗ്രസ് നേതാക്കള് ചെയ്യേണ്ടത്. അഡ്ജസ്റ്റ്മെന്റ് രാഷ്ട്രീയം നിര്ത്തി തോമസ് ചാണ്ടിയടക്കമുള്ള ഇപ്പോഴത്തെ കാട്ടുകള്ളന് മന്ത്രിമാര്ക്കെതിരെ ശബ്ദമുയര്ത്താന് കോണ്ഗ്രസ് നേതാക്കന്മാര് തയ്യാറാകണമെന്ന് ബല്റാം ആവശ്യപ്പെട്ടിരുന്നു.
സിപിഎമ്മിന്റെയും പിണറായി വിജയന്റേയും ഹീനമായ രാഷ്ട്രീയ വേട്ടയാടലാണ് ഇനിയും പ്രസിദ്ധപ്പെടുത്താത്ത സോളാര് അന്വേഷണക്കമ്മീഷന് റിപ്പോര്ട്ടിന്മേല് കോണ്ഗ്രസ് നേതാക്കള്ക്കെതിരായ തിരക്കുപിടിച്ച നടപടികള്. വിശ്വാസ്യതയുടെ തരിമ്പെങ്കിലും ഈ റിപ്പോര്ട്ടിനുണ്ടെന്ന് ഇപ്പോഴത്തെ സൂചനകള് വെച്ച് അനുമാനിക്കാന് കഴിയുന്നതല്ല.
ഏതായാലും കോണ്ഗ്രസ് നേതാക്കളെ സംബന്ധിച്ച് ടിപി ചന്ദ്രശേഖരന് കൊലപാതകത്തിന്റെ പുറകിലെ ഗൂഡാലോചനക്കേസ് നേരാംവണ്ണം അന്വേഷിച്ച് മുന്നോട്ടുകൊണ്ടുപോകാതെ ഇടക്കുവെച്ച് ഒത്തുതീര്പ്പുണ്ടാക്കിയതിന് കിട്ടിയ പ്രതിഫലമായി കണക്കാക്കിയാല് മതി.
'കോണ്ഗ്രസ് മുക്ത് ഭാരത്' എന്നത് ദേശീയതലത്തിലെ ആര്എസ്എസിന്റെ പ്രഖ്യാപിത മുദ്രാവാക്യമാണെങ്കില് 'കോണ്ഗ്രസ് മുക്ത കേരളം' എന്നതാണ് ഇവിടത്തെ സിപിഎമ്മിന്റെ അപ്രഖ്യാപിത നയം. ആ ഗ്യാപ്പില് ബിജെപിയെ വിരുന്നൂട്ടി വളര്ത്തി സര്വ്വമേഖലകളിലും പരാജയപ്പെട്ട സര്ക്കാരിനെതിരായ ഭരണവിരുദ്ധവികാരത്തെ വഴിതിരിച്ചുവിടാനാണ് ഇന്ന് കേരളം ഭരിക്കുന്നവര് ആഗ്രഹിക്കുന്നത് എന്ന് തിരിച്ചറിഞ്ഞ് തിരിച്ചടിക്കാന് കോണ്ഗ്രസിന്റെ മുതിര്ന്ന നേതാക്കള്ക്ക് കഴിയേണ്ടതുണ്ടെന്നും ബല്റാം ഫെയ്സ്ബുക്ക് കുറിപ്പില് പറഞ്ഞിരുന്നു. ഈ കുറിപ്പിന്റെ അടിസ്ഥാനത്തിലാണ് ക്രൈംബ്രാഞ്ച് ബല്റാമിനെ ചോദ്യം ചെയ്തത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ