പത്തനംതിട്ട: ശബരിമല ക്ഷേത്രത്തോട് ആത്മാർഥമായ വിശ്വാസമുണ്ടെങ്കിൽ കണ്ണൂരിലെ യുവതി ശബരിമലയിലേക്കു വരില്ലെന്ന് തിരുവിതാംകൂർ ദേവസ്വം ബോർഡ് പ്രസിഡന്റ് എ പത്മകുമാർ. കണ്ണൂർ സ്വദേശിനിയായ രേഷ്മ വ്രതമെടുത്ത് ശബരിമലയിലേക്കു വരാൻ തയാറെടുക്കുന്നതായുള്ള വാർത്തയോടു പ്രതികരിക്കുകയായിരുന്നു അദ്ദേഹം. 

ആത്മാർഥമായ വിശ്വാസമുള്ള ആളാണെങ്കിൽ ശബരിമലയിലേക്ക് വരുമെന്ന് വിശ്വസിക്കുന്നില്ല. ആചാരങ്ങളെ ബഹുമാനിക്കുന്നവരും അതിന് ശ്രമിക്കില്ല. എന്നാൽ ഇവരൊക്കെ പേരെടുക്കാനാണ് ശ്രമമെങ്കിൽ വന്നേക്കാമെന്നും പത്മകുമാർ പറഞ്ഞു. 

ശബരിമലയിൽ യുവതി പ്രവേശനവുമായി ബന്ധപ്പെട്ട സുപ്രീം കോടതി വിധിയുടെ പശ്ചാത്തലത്തിൽ, താൻ ദർശനത്തിനെത്തുമെന്നും അതിനായി 41 ദിവസത്തെ വ്രതത്തിലാണെന്നും രേഷ്മ ഫെയ്സ്ബുക്കിൽ പോസ്റ്റ് ഇട്ടിരുന്നു. രേഷ്മയ്ക്കെതിരെ പ്രതിഷേധവുമുയരുന്നുണ്ട്. ഇതിന് പിന്നാലെയാണ് പത്മകുമാറിന്റെ നിലപാട്.