ന്യൂഡല്‍ഹി : ശബരിമലയില്‍ സ്ത്രീ പ്രവേശനം അനുവദിച്ചുകൊണ്ടുള്ള സുപ്രിംകോടതി വിധിക്കെതിരെ റിവ്യൂ ഹര്‍ജി നല്‍കാന്‍ തന്നെ ആരും സമീപിച്ചിട്ടില്ലെന്ന് മുതിര്‍ന്ന അഭിഭാഷകനായ മനു അഭിഷേക് സിംഗ്‌വി പറഞ്ഞു. ദേവസ്വം ബോര്‍ഡോ കോണ്‍ഗ്രസോ തന്നെ സമീപിച്ചിട്ടില്ല. സമീപിച്ചാല്‍ നിലപാട് അപ്പോള്‍ അറിയിക്കാമെന്നും സിംഗ്‌വി വ്യക്തമാക്കി.
ശബരിമല വിഷയത്തില്‍ മനു അഭിഷേക് സിംഗ്‌വിയെ കേസ് ഏല്‍പ്പിക്കാന്‍ തീരുമാനിച്ചതായി തിരുവിതാംകൂര്‍ ദേവസ്വം ബോര്‍ഡ് പ്രസിഡന്റ് എ പദ്മകുമാര്‍ കഴിഞ്ഞ ദിവസം ബോര്‍ഡ് യോഗത്തിന് ശേഷം അറിയിച്ചിരുന്നു. ശബരിമലയിലെ നിലവിലെ സ്ഥി്തിഗതികള്‍ രേഖപ്പെടുത്തിയിട്ടുള്ള വിശദമായ റിപ്പോര്‍ട്ട് സമര്‍പ്പിക്കുമെന്നും അദ്ദേഹം സൂചിപ്പിച്ചിരുന്നു. ദേവസ്വം ബോര്‍ഡ് നാളെ ഇതുസംബന്ധിച്ച റിപ്പോര്‍ട്ട് നല്‍കിയേക്കുമെന്നും വാര്‍ത്തകളുണ്ടായിരുന്നു.
ഇതിനിടെയാണ് സംഭവത്തില്‍ നിലപാട് അറിയിച്ച് മനു അഭിഷേക് സിംഗ്‌വി രംഗത്തെത്തിയത്. ശബരിമല കേസില്‍ നിലവില്‍ ദേവസ്വം ബോര്‍ഡിന് വേണ്ടി ഹാജരായത് സിംഗ്‌വിയാണ്. ദേവസ്വംബോര്‍ഡ് മുന്‍ പ്രസിഡന്റ് പ്രയാര്‍ ഗോപാലകൃഷ്ണന്‍ നല്‍കുന്ന റിവ്യൂഹര്‍ജിയെ പിന്തുണക്കുമെന്ന് കോണ്‍ഗ്രസും വ്യക്തമാക്കിയിട്ടുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ