ന്യൂഡല്‍ഹി: കേരളത്തിലെ ഡാമുകള്‍ക്ക് പ്രളയം തടയാനുള്ള ശേഷിയില്ലെന്ന് കേന്ദ്ര ജലകമ്മീഷന്‍. പ്രളയം രൂക്ഷമാക്കിയതില്‍ ഡാമുകള്‍ക്ക് പങ്കില്ലെന്നും കേന്ദ്രജലകമ്മീഷന്‍ പഠനറിപ്പോര്‍ട്ട് പറയുന്നു. തോട്ടപ്പള്ളി സ്പില്‍വെയിലും തണ്ണീര്‍മുക്കം ബണ്ടിലും തടസ്സമുണ്ടായി.ഇത് പ്രളയം രൂക്ഷമാക്കാന്‍ ഇടയാക്കീ. രണ്ടിടത്തും കൂടുതല്‍ ജലമൊഴുക്കാനുള്ള സാഹചര്യം ഉണ്ടാക്കണമെന്നും പഠനറിപ്പോര്‍ട്ട് പറയുന്നു. പഠനറിപ്പോര്‍ട്ട് കേന്ദ്ര ജലകമ്മീഷന്‍ ചെയര്‍മാന് സമര്‍പ്പിച്ചു. 

കേരളത്തിലുണ്ടായത് അസാധാരണമായ സാഹചര്യമായിരുന്നെന്നും 1924ലെ വെള്ളപ്പൊക്കത്തിന് സമാനമായ സാഹചര്യമായിരുന്നു കേരളത്തിലെതെന്ന് പഠനറിപ്പോര്‍ട്ട് പറയുന്നു. പീരുമേട് പ്രഭവകേന്ദ്രമായുള്ള ശക്തമായ മഴയാണ് കേരളത്തില്‍ പെയ്തത്. ഓഗസ്ത് 16,17,18 തിയ്യതികളില്‍ ശക്തമായ മഴയാണ് പെയ്തത്. മഴയില്‍ ഒഴുകിയ വെള്ളത്തിന്റെ അളവ് 12 ബില്യണ്‍ ക്യുബിക്ക് മീറ്ററാണെന്നും കമ്മീഷന്‍ ചൂണ്ടിക്കാട്ടുന്നു.ഡാമുകള്‍ ഇല്ലാത്തിടത്തുപോലും കനത്ത പ്രളയമുണ്ടായെന്നും റിപ്പോര്‍്ട്ടിലുണ്ട്

കേരളത്തിലെ ഡാമുകള്‍ക്ക് സംഭരിക്കാന്‍ കഴിയുന്ന ജലത്തിന്റെ അളവ് രണ്ടര ബില്യണ്‍ ക്യുബിക് മീറ്റര്‍ മാത്രമാണ്. ഇതിന്റെ അഞ്ചിരിട്ടി വെള്ളമാണ് മൂന്ന് ദിവസം പെയ്തത്. ഇന്ത്യയിലെ ഒരുഡാമിനും ഇത്തരത്തില്‍ പ്രളയം തടയാനുള്ള ശേഷിയില്ലെന്നും പഠനറിപ്പോര്‍ട്ട് പറയുന്നു. ഇന്ത്യയിലെ വലിയ ജലസംഭരണിയായ സര്‍ദാര്‍ സരോവറില്‍ പോലും 10 ബില്യണ്‍ ക്യുബിക്ക് മീറ്റര്‍ വെള്ളം സംഭരിക്കാനെ ശേഷിയുള്ളുവെന്നും റിപ്പോര്‍ട്ടിലുണ്ട്.

കൂടാതെ ഡാമുകളുടെ നടത്തിപ്പിന് ചട്ടം ഉണ്ടാകണമെന്നും ജലനിരപ്പ് നിര്‍ണ്ണയിക്കുന്നതുള്‍പ്പെടെ ചട്ടപ്രകാരമായിരിക്കണമെന്നും റിപ്പോര്‍ട്ട് പറയുന്നു.