കോഴിക്കോട്: ഇനിയുള്ള കാലം സുഖമായി ജീവിക്കാന്‍ അതുമതിയാകുമായിരുന്നു. ഏതോ യാത്രക്കാരന്‍ മറന്നു വെച്ചുപോയ ആ സ്വര്‍ണ്ണക്കട്ടി. പക്ഷേ ഓട്ടോ ഡ്രൈവറായ പയ്യാനക്കല്‍ ചാമുണ്ടി വളപ്പ് ഡ്രൈവര്‍ ഹൗസില്‍ ബഷീറിന്റെ ഉള്ളിലെ നന്മയ്ക്ക് ആ സ്വര്‍ണക്കട്ടിയേക്കാള്‍ തൂക്കമുണ്ടായിരുന്നു. 

1.491 കിലോഗ്രാം തൂക്കമുള്ള ഏകദേശം 45 ലക്ഷം രൂപ വിലമതിക്കുന്ന സ്വര്‍ണ കട്ടി പൊലീസില്‍ ഏല്‍പ്പിക്കുകയായിരുന്നു ബഷീര്‍. ബുധനാഴ്ച രാവിലെ പാളയം കമ്മത്ത് ലൈനില്‍ നിന്നും ബഷീറിന്റെ കെഎല്‍ 11 ബിസി 8451 നമ്പര്‍ ഓട്ടോയില്‍ കയറിയ യാത്രക്കാരനാണ് സ്വര്‍ണക്കട്ടി മറന്നു വെച്ചത്. 

ഓട്ടോയില്‍ നിന്നും സ്വര്‍ണക്കട്ടി കിട്ടിയതിന് പിന്നാലെ ബഷീര്‍ അത് ടൗണ്‍ പൊലീസില്‍ ഏല്‍പ്പിക്കുകയായിരുന്നു. ഇതിന് 45 ലക്ഷത്തോളം വില വരുമെന്ന് ടൗണ്‍ എസ്‌ഐ പറഞ്ഞു.