തിരുവനന്തപുരം : സിപിഐ എറണാകുളം ജില്ലാ കമ്മിറ്റി ഡിഐജി ഓഫീസിലേക്ക് നടത്തിയ മാര്‍ച്ചിനിടെയുണ്ടായ ലാത്തിച്ചാര്‍ജില്‍ പൊലീസുകാര്‍ക്കെതിരെ നടപടി വേണ്ടെന്ന് ഡിജിപി.ഡിജിപി ലോക്‌നാഥ് ബെഹ്‌റ ആഭ്യന്തര സെക്രട്ടറിക്ക് നല്‍കിയ റിപ്പോര്‍ട്ടില്‍ വ്യക്തമാക്കി. പൊലീസിന് വീഴ്ച സംഭവിച്ചിട്ടില്ലെന്ന് കളക്ടറുടെ റിപ്പോര്‍ട്ടിലുണ്ടെന്നും ഡിജിപി ചൂണ്ടിക്കാട്ടുന്നു.
വലിയ സംഘര്‍ഷമാണ് മാര്‍ച്ചില്‍ ഉണ്ടായത്. ഇത് പ്രതിരോധിക്കുക മാത്രമാണ് പൊലീസ് ചെയ്തത്. കരുതിക്കൂട്ടി എംഎല്‍എയെ പൊലീസ് മര്‍ദിച്ചിട്ടില്ല. പൊലീസിനെതിരെ നടപടി വേണമെന്ന് കളക്ടറുടെ റിപ്പോര്‍ട്ടിലും ആവശ്യപ്പെട്ടിട്ടില്ല. സംഘര്‍ഷത്തില്‍ എംഎല്‍എയ്ക്ക് പുറമെ ജില്ലാ സെക്രട്ടറി പി രാജു അടക്കമുള്ള സിപിഐ നേതാക്കള്‍ക്കും പൊലീസുകാര്‍ക്കും പരിക്കേറ്റിരുന്നു.
പൊലീസ് ലാത്തിച്ചാര്‍ജില്‍ എറണാകുളം അസിസ്റ്റന്റ് കമ്മീഷണര്‍ക്കും, എസ്‌ഐ അടക്കമുള്ള പൊലീസ് ഉദ്യോഗസ്ഥര്‍ക്കും എതിരെ നടപടി വേണമെന്നായിരുന്നു സിപിഐ ആവശ്യപ്പെട്ടിരുന്നത്. സര്‍ക്കാരിന്റെ നടപടി അറിഞ്ഞശേഷം പ്രതികരിക്കാമെന്നാണ് പി രാജു പ്രതികരിച്ചത്. മുഖ്യമന്ത്രിയുടെ നിലപാട് അറിഞ്ഞ ശേഷം തുടര്‍നടപടിയെന്ന് എല്‍ദോ എബ്രഹാം എംഎല്‍എ പറഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ