തിരുവനന്തപുരം: ശബരിമലയില്‍ യുവതികള്‍ ദര്‍ശനം നടത്തിയതിനു പിന്നാലെ
നടയടച്ച തന്ത്രിയുടെ നടപടി കോടതിയലക്ഷ്യമാണെന്ന് ദേവസ്വം ബോര്‍ഡ് കമ്മീഷണര്‍ എന്‍ വാസു. തെറ്റായ നടപടിയാണ് തന്ത്രിയുടെ ഭാഗത്ത് നിന്നും ഉണ്ടായിരിക്കുന്നത്. ബോര്‍ഡുമായി കൂടിയാലോചിക്കാതെ സ്വീകരിച്ച പ്രവര്‍ത്തിയാണിതെന്നും അദ്ദേഹം പറഞ്ഞു. ഇക്കാര്യം ചൂണ്ടിക്കാട്ടി നാളെ ദേവസ്വം ബോര്‍ഡിന് റിപ്പോര്‍ട്ട് സമര്‍പ്പിക്കുമെന്നും കമ്മീഷണര്‍ വ്യക്തമാക്കി.
സുപ്രിംകോടതി വിധിക്കെതിരായ നടപടി ഉണ്ടായ സാഹചര്യത്തില്‍ തന്ത്രി കണ്ഠര് രാജീവരോട് വിശദീകരണം ആവശ്യപ്പെട്ട് നോട്ടീസ് നല്‍കുമെന്ന് റിപ്പോര്‍ട്ടുകളുണ്ട്. വിശദീകരണം തൃപ്തികരമല്ലെങ്കില്‍ ഉചിതമായ നടപടി ബോര്‍ഡ് കൈക്കൊണ്ടേക്കും.
അതേസമയം ശുദ്ധിക്രിയകള്‍ ചെയ്തതുമായി ബന്ധപ്പെട്ട് വിശദീകരണം തേടില്ല.
അത്തരം കാര്യങ്ങളില്‍ തന്ത്രിക്ക് അവകാശമുണ്ടെന്നും ബോര്‍ഡ് നേരത്തേ വ്യക്തമാക്കിയിരുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ