തിരുവനന്തപുരം: ലോക്‌സഭാ തിരഞ്ഞെടുപ്പില്‍ കൂടുതല്‍ സീറ്റുകളില്‍ വിജയം ലക്ഷ്യമിട്ട് സിപിഎം സ്ഥാനാര്‍ഥി പട്ടികയാകുന്നു. കോഴിക്കോട് ഡിവൈഎഫഐ അഖിലേന്ത്യ പ്രസിഡന്റ് മുഹമ്മദ് റിയാസ് സ്ഥാനാര്‍ത്ഥിയാകും. കോട്ടയത്ത് ഡോ. സിന്ധുമോള്‍ ജേക്കബ്, വടകരയില്‍ സതീദേവി എല്‍ഡിഎഫ് സ്ഥാനാര്‍ഥി പട്ടികയില്‍. കോഴിക്കോട് എ പ്രദീപ്കുമാര്‍ എംഎല്‍എ സ്ഥാനാര്‍ഥിയായേക്കും. ആലപ്പുഴയില്‍ എഎം ആരിഫ് എംഎല്‍എ ഇടതുമുന്നണി സ്ഥാനാര്‍ഥിയാകും. ചാലക്കുടിയില്‍ ഇന്നസെന്റ്് വീണ്ടും ജനവിധി തേടും.
ലോക്‌സഭാ തിരഞ്ഞെടുപ്പില്‍ പി.കരുണാകരന്‍ ഒഴികെയുള്ള സിറ്റിങ് എം.പിമാെര മല്‍സരിപ്പിക്കാന്‍ സിപിഎം സംസ്ഥാന സെക്രട്ടേറിയറ്റ് തീരുമാനം. എറണാകുളത്ത് പി രാജീവിനാണ് മുന്‍ഗണന. കോട്ടയം സീറ്റ് ജനതാദള്‍ എസില്‍ നിന്ന് തിരിച്ചെടുക്കാനും യോഗം തീരുമാനിച്ചു. സെക്രട്ടേറിയറ്റ് യോഗം തിരുവനന്തപുരത്തു തുടരുകയാണ്.
ആറ്റിങ്ങലില്‍ എ സമ്പത്തും പാലക്കാട് എംബി രാജേഷും കണ്ണൂരില്‍ പികെശ്രീമതിയും വീണ്ടും ജനവിധി തേടും. ആലത്തൂരില്‍ കെരാധാകൃഷ്ണന്റെ പേര് ശക്തമായി ഉയര്‍ന്നിരുന്നെങ്കിലും, പികെബിജുവിന് വീണ്ടും അവസരം നല്‍കാനാണ് തീരുമാനം. ഇടുക്കിയില്‍ ജോയ്‌സ് ജോര്‍ജു തന്നെ സ്വതന്ത്രസ്ഥാനാര്‍ഥിയാകും. കൊല്ലത്ത് കെഎന്‍ ബാലഗോപാലും സീറ്റുറപ്പിച്ചുകഴിഞ്ഞു. കോട്ടയം തിരിച്ചെടുത്ത് പതിനാറു സീറ്റിലും സിപിഎം മല്‍സരിക്കണമെന്നാണ് സെക്രട്ടേറിയറ്റിന്റെ പൊതുവികാരം. ഘടകകക്ഷികളുമായുള്ള ഉഭയകക്ഷി ചര്‍ച്ചകള്‍ക്കു ശേഷമായിരിക്കും അന്തിമതീരുമാനം. ഇന്ന് സെക്രട്ടേറിയറ്റ് തയാറാക്കുന്ന പട്ടിക നാളെ ലോക്‌സഭാ മണ്ഡലം കമ്മിറ്റികള്‍ ചര്‍ച്ച ചെയ്യും.
മറ്റന്നാള്‍ മുതല്‍ ചേരുന്ന സംസ്ഥാനസമിതിക്കു ശേഷം കേന്ദ്രനേതൃത്വത്തിന്റെ അംഗീകാരത്തോടെ ഔദ്യോഗികമായി പ്രഖ്യാപിക്കും.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ