തൊടുപുഴ : കേരള കോണ്‍ഗ്രസിലെ അധികാരത്തര്‍ക്കത്തില്‍ ജോസ് കെ മാണിക്ക് തിരിച്ചടി. ജോസ് കെ മാണി ചെയര്‍മാനല്ലെന്ന് കട്ടപ്പന സബ് കോടതി ഉത്തരവിട്ടു. ചെയര്‍മാന്റെ അധികാരം തടഞ്ഞ ഇടുക്കി മുന്‍സിഫ് കോടതി വിധി ശരിവെച്ചു. ജോസ് കെ മാണിയെ ചെയര്‍മാനാക്കിയ തീരുമാനത്തിലുള്ള സ്‌റ്റേ തുടരുമെന്നും കോടതി വ്യക്തമാക്കി.
ജോസ് കെ മാണിയെ ചെയര്‍മാനായി തെരഞ്ഞെടുത്തുകൊണ്ടുള്ള ജോസ് കെ മാണി പക്ഷത്തിന്റെ നടപടിയാണ് മുന്‍സിഫ് കോടതി സ്‌റ്റേ ചെയ്തിരുന്നത്. ഇത് ചോദ്യം ചെയ്താണ് ജോസ് കെ മാണി പക്ഷം സബ് കോടതിയെ സമീപിച്ചത്. എന്നാല്‍ ജോസ് കെ മാണിയുടെ അപ്പീല്‍ കോടതി തള്ളുകയായിരുന്നു.
പാര്‍ട്ടി ചെയര്‍മാന്‍ പദവിയോ, അധികാരമോ ഉപയോഗിക്കാന്‍ അര്‍ഹതയില്ലെന്നും, അച്ചടക്ക നടപടി സ്വീകരിക്കാന്‍ അധികാരമില്ലെന്നും കോടതി വ്യക്തമാക്കിയിട്ടുണ്ട്. മുന്‍സിഫ് കോടതി വിധിയില്‍ ഇടപെടേണ്ട സാഹചര്യമില്ലെന്നും കോടതി വ്യക്തമാക്കി.
കോടതി ധാര്‍മ്മികമായ വിജയമാണെന്നും, ഇനിയെങ്കിലും അഹങ്കാരവും ധാര്‍ഷ്ട്യവും വെടിഞ്ഞ് പി ജെ ജോസഫിന്റെയും സിഎഫ് തോമസിന്റെയും നേതൃത്വത്തെ അംഗീകരിച്ച് പ്രവര്‍ത്തിക്കാന്‍ ജോസ് കെ മാണിയും കൂട്ടരും തയ്യാറാകണമെന്ന് ജോസഫ് പക്ഷ നേതാവായ എംജെ ജേക്കബ് അഭിപ്രായപ്പെട്ടു. പി ജെ ജോസഫ് വിളിച്ചുചേര്‍ത്ത നിയമസഭാകക്ഷിയോഗത്തില്‍ പങ്കെടുത്തില്ലെങ്കില്‍ അയോഗ്യത അടക്കമുള്ള നടപടികള്‍ നേരിടേണ്ടി വരുമെന്നും ജേക്കബ് സൂചിപ്പിച്ചു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ