ന്യൂഡൽഹി: പിറവം പള്ളി കേസിലെ വിധി പുനഃപരിശോധിക്കണമെന്ന് ആവശ്യപ്പെട്ടുള്ള തിരുത്തൽ ഹർജി ഇന്ന് സുപ്രിംകോടതിയിൽ. യാക്കോബായ സഭ നൽകിയ തിരുത്തൽ ഹര്‍ജിയാണ് സുപ്രിംകോടതി പരിഗണിക്കുന്നത്. ചീഫ് ജസ്റ്റിസിന്‍റെ നേതൃത്വത്തിൽ അഞ്ച് ജഡ്ജിമാരായിരിക്കും തിരുത്തൽ ഹര്‍ജി പരിശോധിക്കുക. ഉച്ചക്ക് ഒന്നര മണിക്ക് ചീഫ് ജസ്റ്റിസിന്‍റെ ചേംബറിലാണ് ഹര്‍ജി പരിഗണിക്കുക.
ചീഫ് ജസ്റ്റിസിന്‍റെ നേതൃത്വത്തിലുള്ള സുപ്രീംകോടതിയിലെ മുതിര്‍ന്ന മൂന്ന് ജഡ്ജിമാർക്ക് പുറമെ, കേസിൽ വിധി പറഞ്ഞ ജസ്റ്റിസ് അരുണ്‍ മിശ്ര ഉൾപ്പടെയുള്ളവരും ചേര്‍ന്നാകും കേസ് പരിഗണിക്കുക. കേസിലെ പുനഃപരിശോധന ഹര്‍ജി നേരത്തെ തള്ളിയിരുന്നു.
മലങ്കര സഭക്ക് കീഴിലുള്ള എല്ലാ പള്ളികളും 1934 ലെ ഭരണഘടന പ്രകാരം ഭരിക്കപ്പെടണം എന്നായിരുന്നു ജസ്റ്റിസ് അരുണ്‍ മിശ്ര അദ്ധ്യക്ഷനായ രണ്ടംഗ ബെഞ്ചിന്‍റെ വിധി. അതിനെതിരെയാണ് യാക്കോബായ സഭ തിരുത്തൽ ഹര്‍ജി നൽകിയത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ