തിരുവനന്തപുരം: സംസ്ഥാനത്ത് ഇന്നു മുതല്‍ മഴയുടെ ശക്തി കുറയുമെന്ന് റിപ്പോര്‍ട്ട്. 15 വരെ (ഞായര്‍) വ്യാപക മഴയുടെ മുന്നറിയിപ്പുകളില്ല. എന്നാല്‍ ശക്തമായ കാറ്റിന് സാധ്യതയുള്ളതിനാല്‍ 16 വരെ മത്സ്യബന്ധനത്തിനു പോകരുതെന്ന് മുന്നറിയിപ്പുണ്ട്. അറബിക്കടലിന്റെ തെക്കുപടിഞ്ഞാറ്, മധ്യപടിഞ്ഞാറു ഭാഗങ്ങളിലാണ് അപകട മുന്നറിയിപ്പുള്ളത്.

ഈ വര്‍ഷം കേരളത്തില്‍ ഇടവപ്പാതി 14 ശതമാനത്തില്‍ കൂടുതല്‍ ലഭിച്ചിട്ടുണ്ടെന്നാണ് കണക്കുകള്‍. ജൂണ്‍ 1 മുതല്‍ ഇന്നലെ വരെ പെയ്ത മഴക്കണക്കു പ്രകാരം, കേരളത്തില്‍ ലഭിച്ച മഴ 14 ശതമാനം അധികമാണ്. 1894 മില്ലിമീറ്റര്‍ മഴ ലഭിക്കേണ്ട സ്ഥാനത്ത് 2153 മില്ലിമീറ്റര്‍ മഴ പെയ്തിട്ടുണ്ട്.  

പാലക്കാട് ജില്ലയില്‍ ശരാശരിയേക്കാള്‍ 42 ശതമാനം അധികമഴ ലഭിച്ചു. കോഴിക്കോട് 38 ശതമാനവും മലപ്പുറത്ത് 23 ശതമാനവും അധികം മഴ പെയ്തു. അതേസമയം, വയനാട്ടില്‍ ഇപ്പോഴും മഴ ശരാശരിയേക്കാള്‍ 4 ശതമാനം കുറവാണ്.