തിരുവനന്തപുരം: സംസ്ഥാനത്ത് 18ന് (ബുനാഴ്ച) ഒറ്റപ്പെട്ട സ്ഥലങ്ങളില്‍ കനത്ത മഴയ്ക്കു സാധ്യതയെന്നു കാലാവസ്ഥാ നിരീക്ഷണകേന്ദ്രം മുന്നറിയിപ്പ് നല്‍കി. ആലപ്പുഴ, എറണാകുളം, മലപ്പുറം ജില്ലകളിലാണ് യെല്ലോ അലേര്‍ട്ട്. ഈ ജില്ലകളില്‍ ഒറ്റപ്പെട്ട പ്രദേശങ്ങളില്‍ 11 സെന്റീമീറ്റര്‍ വരെയുള്ള കനത്ത മഴയ്ക്കുള്ള സാധ്യതയുണ്ടെന്നാണ് മുന്നറിയിപ്പ്. 

ചൊവ്വാഴ്ച വരെ അറബിക്കടലിന്റെ തെക്കുപടിഞ്ഞാറ്, മധ്യപടിഞ്ഞാറ് ഭാഗങ്ങളില്‍ കാറ്റിന്റെ വേഗം ചില അവസരങ്ങളില്‍ മണിക്കൂറില്‍ 40 മുതല്‍ 50 കിലോമീറ്റര്‍ വരെ ആകാന്‍ സാധ്യതയുള്ളതിനാല്‍ മത്സ്യത്തൊഴിലാളികള്‍ ഈ ഭാഗങ്ങളില്‍ മത്സ്യബന്ധനത്തിന് പോകരുതെന്നും കാലാവസ്ഥാ നിരീക്ഷണകേന്ദ്രം മുന്നറിയിപ്പ് നല്‍കി. 

തെക്കുപടിഞ്ഞാറന്‍ കാലവര്‍ഷത്തില്‍ ശനിയാഴ്ച വരെ 13 ശതമാനം അധികമഴയാണു സംസ്ഥാനത്തു രേഖപ്പെടുത്തിയിരിക്കുന്നത്. കാലവര്‍ഷത്തില്‍ നിന്നും ആകെ ലഭിക്കേണ്ട മഴയേക്കാള്‍ അധികവും ഇതിനോടകം ലഭിച്ചു കഴിഞ്ഞു. 203 സെന്റീമീറ്റര്‍ മഴയാണു കാലവര്‍ഷത്തില്‍ നിന്നും കേരളത്തിനു കിട്ടേണ്ടത്. എന്നാല്‍ കാലവര്‍ഷം പിന്‍വാങ്ങാന്‍ രണ്ടാഴ്ച കൂടി ബാക്കിയുള്ളപ്പോള്‍ തന്നെ ശനിയാഴ്ച വരെ 216 സെന്റീമീറ്റര്‍ മഴയാണ് സംസ്ഥാനത്തു പെയ്തത്.