ഭോപ്പാല്‍ : മധ്യപ്രദേശിലെ ഭോപ്പാലില്‍ ആരോഗ്യ വകുപ്പിലെ ജീവനക്കാരനായ മലയാളിക്ക് കോവിഡ് സ്ഥിരീകരിച്ചു. ഇദ്ദേഹത്തിന്റെ കുടുംബാംഗങ്ങള്‍ക്കും കോവിഡ് സ്ഥിരീകരിച്ചിട്ടുണ്ട്. മൂന്നംഗ കുടുംബത്തിനാണ് വൈറസ് ബാധ കണ്ടെത്തിയത്. മധ്യപ്രദേശില്‍ കോവിഡ് രോഗബാധ വ്യാപകമാകുകയാണ്. ഭോപ്പാലില്‍ മാത്രം 142 പേര്‍ക്ക് കോവിഡ് സ്ഥിരീകരിച്ചിട്ടുണ്ട്. ഇതില്‍ 75 പേര്‍ ആരോഗ്യപ്രവര്‍ത്തകരാണെന്നാണ് റിപ്പോര്‍ട്ടുകള്‍.

ഭോപ്പാലില്‍ ഒരു ഐഎഎസ് ഓഫീസര്‍ അടക്കം ഒമ്പതു പേര്‍ക്ക് ഞായറാഴ്ച മാത്രം കോവിഡ് സ്ഥിരീകരിച്ചിട്ടുണ്ട്. ഐഎഎസ് ഉദ്യോഗസ്ഥനായ സോമേഷ് മിശ്രയ്ക്കാണ് കോവിഡ് സ്ഥിരീകരിച്ചത്. ഭോപ്പാലില്‍  49 കാരനായ ഇമ്രാന്‍ ഖാന്‍ മരിച്ചത് കൊറോണ കാരണമാണെന്നും സ്ഥിരീകരിച്ചിട്ടുണ്ട്.

ഭോപ്പാലില്‍ കോവിഡ് ബാധിച്ച് മൂന്നുപേരാണ് മരിച്ചത്. നഗരത്തില്‍ കോവിഡ് ബാധിച്ചവരില്‍ നാല് ഐഎഎസ് ഓഫീസര്‍മാരും 20 പൊലീസുകാരും ഇവരുടെ കുടുംബാംഗങ്ങളും ഉള്‍പ്പെടുന്നതായി റിപ്പോര്‍ട്ടുണ്ട്. ഇന്‍ഡോറില്‍ നേരത്തെ കോവിഡ് ബാധിച്ച് രണ്ട് ഡോക്ടര്‍മാര്‍ മരിച്ചിരുന്നു.