ആലപ്പുഴ: ആലപ്പുഴയില്‍ കോവിഡ് വ്യാപനം രൂക്ഷമായി തുടരുന്നു. ജീവനക്കാരിക്ക് കോവിഡ് സ്ഥിരീകരിച്ച സാഹചര്യത്തില്‍ ആലപ്പുഴ മെഡിക്കല്‍ കോളജിലെ കീമോതെറാപ്പി യൂണിറ്റ് താത്കാലികമായി അടച്ചു. നിലവില്‍ ആലപ്പുഴ മെഡിക്കല്‍ കോളജില്‍ ഡോക്ടര്‍മാരുള്‍പ്പെടെ 15 പേര്‍ കോവിഡ് ബാധിച്ച് ചികിത്സയിലാണ്.

 ഇന്ന് ജില്ലയില്‍ കോവിഡ് ബാധിച്ച് രണ്ട് പേര്‍ കൂടി മരിച്ചു.കൃഷ്ണപുരം സ്വദേശി 60 വയസുള്ള മോഹനന്‍, പുന്നപ്ര തെക്ക് സ്വദേശി 65 വയസുള്ള അഷ്‌റഫ് എന്നിവരാണ് മരിച്ചത്. നെഞ്ചുവേദനയും ശ്വാസമുട്ടലുമായി ശനിയാഴ്ച കായംകുളം താലൂക്ക് ആശുപത്രിയില്‍ പ്രവേശിപ്പിച്ച മോഹനന് മരണശേഷമുള്ള സ്രവ പരിശോധനയിലാണ് കോവിഡ് സ്ഥിരീകരിച്ചത്. വൃക്കരോഗത്തിന് വണ്ടാനം മെഡിക്കല്‍ കോളജില്‍ ചികിത്സയിലിരിക്കെ വെള്ളിയാഴ്ചയാണ് അഷ്‌റഫിന് കോവിഡ് സ്ഥിരീകരിച്ചത്. ഇതോടെ ആലപ്പുഴ ജില്ലയില്‍ കോവിഡ് ബാധിച്ച് മരിച്ചവരുടെ എണ്ണം 20 ആയി.