തിരുവനന്തപുരം: കവയിത്രി സുഗതകുമാരി അന്തരിച്ചു. 86 വയസായിരുന്നു. കോവിഡ് ബാധിച്ച് തിരുവനന്തപുരം മെഡിക്കല് കോളജ് ആശുപത്രിയില് ചികിത്സിയിലായിരുന്നു.
മുത്തുച്ചിപ്പി, പാതിരാപ്പൂക്കള്, പാവം പാവം മാനവഹൃദയം, പ്രണാമം, ഇരുള്ചിറകുകള്, രാത്രിമഴ, അമ്പലമണി, കുറിഞ്ഞിപ്പൂക്കള്, തുലാവര്ഷപ്പച്ച, രാധയെവിടെ, ദേവദാസി, മണലെഴുത്ത്, അഭിസാരിക, സുഗതകുമാരിയുടെ കവിതകള്, മേഘം വന്നുതോറ്റപ്പോള്, പൂവഴി മറുവഴി, കാടിന്കാവല് തുടങ്ങിയവാണ് പ്രമുഖ കൃതികള്.
കേരളസാഹിത്യ അക്കാദമി അവാര്ഡ്, കേന്ദ്രസാഹിത്യ അക്കാദമി അവാര്ഡ്, പദ്മശ്രീ, എഴുത്തച്ഛന് പുരസ്കാരം, സരസ്വതി സമ്മാന്, മാതൃഭൂമി സാഹിത്യപുരസ്കാരം, ബാലസാഹിത്യത്തിനു നല്കിയ സമഗ്രസംഭാവനയ്ക്കുള്ള പുരസ്കാരം തുടങ്ങി അനേകം പുരസ്കാരങ്ങള് നല്കി സാഹിത്യസാംസ്കാരികലോകം ആദരിച്ചിട്ടുണ്ട്.
ബോധേശ്വരന്റെയും വി കെ കാര്ത്യായനി ടീച്ചറുടെയും മകളായി 1934 ജനുവരി ഇരുപത്തി രണ്ടിനാണ് സുഗതകുമാരി ജനിച്ചത്. അമ്മ. തത്വശാസ്ത്രത്തില് തിരുവനന്തപുരം യൂണിവേഴ്സ്റ്റി കോളേജില് നിന്നും ബിരുദാനന്തര ബിരുദമെടുത്തശേഷം ധര്മാര്ഥ കാമമോക്ഷങ്ങളിലെ മോക്ഷം എന്ന സങ്കല്പത്തെക്കുറിച്ച് മൂന്ന് വര്ഷം തത്വശാസ്ത്രഗവേഷണപഠനം നടത്തിയെങ്കിലും പൂര്ത്തിയാക്കാതെ ഉപേക്ഷിച്ചു.
കേരളത്തില് പ്രകൃതി സംരക്ഷണസമിതി രൂപീകരിച്ചപ്പോള് സ്ഥാപക സെക്രട്ടറിയായി പ്രവര്ത്തിച്ചു. ഉറ്റവരാല് ഉപേക്ഷിക്കപ്പെടുന്ന സ്ത്രീകളെ പുനരധിവസിപ്പിക്കുക എന്ന ലക്ഷ്യത്തോടെ'അഭയ' എന്ന സ്ഥാപനം ആരംഭിച്ചു. സംസ്ഥാന വനിതാകമ്മീഷന്റെ ആദ്യത്തെ ചെയര്പേഴ്സണ്, സൈലന്റ് വാലി സംരക്ഷണ പ്രക്ഷോഭത്തിന്റെ നേതൃനിരകളിലൊരാള് തുടങ്ങിയ നിലകളിലും പ്രവര്ത്തിച്ചിരുന്നു.
വിദ്യാഭ്യാസവിചക്ഷണനും എഴുത്തുകാരനും നിരൂപകനുമായിരുന്ന പരേതനായ ഡോ. കെ വേലായുധന് നായരായിരുന്നു ഭര്ത്താവ്. ലക്ഷ്മി ഏകമകളാണ്. ഡോ. ഹൃദയകുമാരി, ഡോ. സുജാതാദേവി എന്നിവര് സഹോദരിമാരാണ്
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ