കണ്ണൂര്‍: പ്ലസ് വൺ വിദ്യാർത്ഥിയെ പ്രകൃതി വിരുദ്ധ പീഡനത്തിന് ഇരയാക്കിയ കേസിൽ സാമൂഹിക പ്രവർത്തകൻ അറസ്റ്റിൽ. കണ്ണൂർ ചക്കരക്കൽ സ്വദേശി മോഹനനാണ് അറസ്റ്റിലായത്. സഹായം ചോദിച്ചെത്തിയ പ്ലസ് വൺ വിദ്യാർത്ഥിയെ തന്റെ മുറിയിലേക്ക് വിളിച്ചുവരുത്തി ഇയാൾ പീഡിപ്പിക്കുകയായിരുന്നു. രണ്ട് വർഷം മുൻപാണ് സംഭവമുണ്ടായത്.

ഇതര സംസ്ഥാനത്ത് ജനിച്ച കുട്ടിയുടെ സ്കൂൾ സർട്ടിഫിക്കറ്റിലെ മേൽവിലാസത്തിൽ തെറ്റുകൾ ഉണ്ടായിരുന്നു. ഇത് ശരിയാക്കാൻ സ്ഥലത്തെ സാമൂഹ്യ പ്രവർത്തകനും, കുട്ടികൾക്ക് സ്ഥിരം ക്ലാസ് എടുക്കുന്ന ആളുമായ മോഹനനെ രക്ഷിതാക്കൾ സമീപിച്ചു. തുടർന്ന് കുട്ടിയോട് തന്‍റെ വാടക മുറിയിൽ എത്താൻ മോഹനൻ പറഞ്ഞു. അവിടെവെച്ചാണ് പീഡനത്തിന് ഇരയാക്കിയത്.

പേടികാരണം അന്ന് കുട്ടി ഇക്കാര്യം പുറത്തു പറഞ്ഞിരുന്നില്ല. പിന്നീട് ചൈൾഡ് ലൈൻ പ്രവ‍ർത്തകരോടാണ് കുട്ടി പീഡന വിവരം പറയുന്നത്. സംഭവം അന്വേഷിച്ച ചക്കരക്കൽ പൊലീസ് പ്രഥമ ദൃഷ്ട്യ തെളിവുണ്ടെന്ന് കണ്ടെത്തി. പ്രതി മോഹനനെ തലശ്ശേരി സിജെഎം കോടതിയിൽ ഹാജരാക്കിയ ശേഷം പതിനാല് ദിവസത്തേക്ക് റിമാൻഡ് ചെയ്തു.