മലപ്പുറം; കുവൈറ്റിൽ നിന്ന് 13 ന് നാട്ടിലേക്ക് നിറവയറുമായി പറന്നിറങ്ങുമ്പോൾ ജിൻസിയുടെ മനസിൽ ആശങ്കകൾ ഏറെയായിരുന്നു. കോവിഡ് ഉണ്ടാകുമോ എന്ന പേടിയ്ക്കൊപ്പം പിറക്കാൻ പോകുന്ന കൺമണിയെക്കുറിച്ചുള്ള ആശങ്കകളും. ഇനി ജിൻസിയുടെ ജീവിതത്തിൽ സന്തോഷത്തിന്റെ നാളുകളാണ്. മാലാഖക്കുഞ്ഞിന് ജന്മം നൽകിയതിനൊപ്പം കോവിഡ് മുക്തയായിരിക്കുകയാണ് ജിൻസി. മഞ്ചേരി മെഡിക്കൽ മെഡിക്കൽ കോളജ് ആശുപത്രിയിലാണ് അവർ ചികിത്സയിൽ കഴിഞ്ഞിരുന്നത്.

കുവൈത്തിൽ നഴ്സായി ജോലി ചെയ്യുകയായിരുന്ന അവർ ആലപ്പുഴ ആര്യാട് സ്വദേശിയാണ്. എയർ ഇന്ത്യ എക്സ്പ്രസ് വിമാനത്തിലാണ് ജിൻസി കരിപ്പൂരിലെത്തിയത്. ആലപ്പുഴയിലേക്കുള്ള യാത്ര ബുദ്ധിമുട്ട് ആയതിനാൽ മഞ്ചേരി മെഡിക്കൽ കോളജ് ആശുപത്രിയിൽ പ്രവേശിപ്പിക്കുകയായിരുന്നു. ആദ്യത്തെ കോവിഡ് പരിശോധനയിലെ ഫലം അവ്യക്തമായത് ആശങ്ക വർധിപ്പിക്കാൻ കാരണമായിരുന്നു.

സ്രവ പരിശോധനയിൽ പോസിറ്റീവോ നെഗറ്റീവോ എന്ന് ഉറപ്പുപറയാൻ ആയില്ലെന്നാണ് അധികൃതർ അറിയിച്ചതെന്ന് ഭർത്താവ് ലിജോ പറഞ്ഞു. പിന്നീട് നടത്തിയ പരിശോധനയിൽ നെഗറ്റീവ് ആയി. തുടർന്ന് ഐസിയുവിൽ പ്രവേശിപ്പിച്ചു. ഇന്നലെ 11.30ന് ശസ്ത്രക്രിയയിലൂടെ ആയിരുന്നു പ്രസവം. കുഞ്ഞിന് 2.7 കിലോഗ്രാം തൂക്കമുണ്ട്. ആരോഗ്യനില തൃപ്തികരമാണ്. നവജാത ശിശുവിന്റെ സ്രവം പരിശോധനയ്ക്ക് അയച്ചിട്ടുണ്ട്.