കണ്ണൂര്‍: ജില്ലയില്‍ ഒരു വാര്‍ഡില്‍ കൂടി സിപിഎമ്മിന് എതിരില്ലാതെ ജയം. തലശ്ശേരി നഗരസഭയിലെ മമ്പള്ളിക്കുന്ന് വാര്‍ഡിലെ കോണ്‍ഗ്രസ് സ്ഥാനാര്‍ഥി പത്രിക പിന്‍വലിച്ചതോടെയാണ് സിപിഎം സ്ഥാനാര്‍ഥി വിജയം ഉറപ്പിച്ചത്. പത്രികയില്‍ നാമനിര്‍ദേശകന്റെ ഒപ്പ് വ്യാജമാണെന്ന പരാതി ഉയര്‍ന്നതോടെ കോണ്‍ഗ്രസ് സ്ഥാനാര്‍ഥി പത്രിക പിന്‍വലിച്ചു.

അതേസമയം, നാമനിര്‍ദേശകനായ കോണ്‍ഗ്രസ് അനുഭാവി പരാതി നല്‍കിയത് സിപിഎമ്മിന്റെ ഭീഷണിക്കു വഴങ്ങിയാണെന്ന് കോണ്‍ഗ്രസ് ആരോപിച്ചു.  മമ്പള്ളിക്കുന്നില്‍ കഴിഞ്ഞ തവണ സിപിഎം 671, കോണ്‍ഗ്രസ് 96, ബിജെപി 65 എന്നതായിരുന്നു വോട്ടുനില. ഇത്തവണ ബിജെപിക്ക് സ്ഥാനാര്‍ഥിയില്ല. ഇതോടെ എതിരില്ലാതെ എല്‍ഡിഎഫ് സ്ഥാനാര്‍ഥികള്‍ വിജയിച്ച വാര്‍ഡുകളുടെ എണ്ണം 16 ആയി.