മലപ്പുറം: കോവിഡ് പ്രതിസന്ധിക്കിടയിൽ ജോലി നഷ്ടപ്പെട്ടപ്പോൾ കപ്പ വിൽപ്പന നടത്തി കുടുംബം പുലർത്തുകയാണ് മദ്രസ അധ്യാപകന്‍. മലപ്പുറം മങ്കട സ്വദേശിയായ അബ്ദുസ്സലാം ആണ് കോഴിക്കോട് പാലക്കാട് നാഷണൽ ഹൈവേ റോഡരികിലിരുന്ന് കപ്പ വിൽപ്പന നടത്തുന്നത്. ഏഴ് മാസത്തോളമായി നിത്യചിലവിനുള്ള പണം അബ്ദുസ്സലാം കണ്ടെത്തുന്നത് ഇങ്ങനെയാണ്.

മങ്കടയിലെ ഒരു മദ്രസയിൽ ആയിരുന്നു അബ്ദുസ്സലാം ജോലി നോക്കിയിരുന്നത്. കോവിഡ് വ്യാപനത്തെതുടർന്ന് വിദ്യാഭ്യാസ സ്ഥാപനങ്ങൾ അടച്ചിടാനുള്ള സർക്കാർ തീരുമാനം വന്നതോടെ മദ്രസയും അടച്ചിട്ടു. ഇതോടെ വരുമാനം നിലച്ചതോടെയാണ് അബ്ദുസ്സലാം കപ്പ വില്‍പ്പന നടത്താന്‍ തീരുമാനിക്കുന്നത്.