കൊച്ചി; അത്ഭുത ദ്വീപ് എന്ന ചിത്രത്തിലൂടെയാണ് മലയാളികൾ ഷൺമുഖനെ പരിചയപ്പെടുന്നത്. പിന്നീട് നിരവധി സിനിമകളിൽ അദ്ദേഹം അഭിനയിച്ചു. എന്നാൽ ലോക്ക്ഡൗണിനെ തുടർന്ന് സിനിമരം​ഗം പ്രതിസന്ധിയിലായെങ്കിലും ഷൺമുഖൻ തിരക്കിലാണ്. കൈയിൽ ഭാ​ഗ്യദേവതയുമായി തെരുവിൽ അലയുകയാണ് ഈ താരം. 

മൂവാറ്റുപുഴയിൽ എത്തിയാൽ തോളിലൂടെ ഒരു ബാ​ഗു തൂക്കി കൈയിൽ ലോട്ടറിയുമായി ഷൺമുഖനെ കാണം. രസകരമായ സംഭാഷണത്തിലൂടെ തന്റെ കസ്റ്റമേഴ്സിനെ കയ്യിലാക്കാനും അദ്ദേഹത്തിന് വശമുണ്ട്. കുറച്ചു ബുദ്ധിമുട്ടുകളൊക്കെയുണ്ടെങ്കിലും സിനിമയിൽ നിന്ന് ലോട്ടറി കച്ചവടത്തിലേക്ക് വരേണ്ടിവന്നതിന്റെ ദുഃഖമൊന്നും ഷൺമുഖനില്ല. ഒരു കണക്കിന് ഇതാണ് ലാഭമെന്നാണ് അദ്ദേഹം പറയുന്നത്. സിനിമയിൽ അഭിനയിക്കാൻ പോയാൽ കിട്ടുന്നതിനേക്കാൾ കൂടുതൽ ലോട്ടറി ടിക്കറ്റ് വിറ്റാൽ കിട്ടുന്നുണ്ടെന്നും അതിൽ ഹാപ്പിയാണെന്നും ഷൺമുഖൻ പറയുന്നു.

നാൽപത്തേഴുകാരനായ ഷൺമുഖന് അമ്മ മാത്രമാണ് ഉണ്ടായിരുന്നത്. എന്നാൽ അമ്മ മരിച്ചതോടെ പള്ളുരുത്തിയിൽ കൂട്ടുകാരനൊപ്പമാണ്  താമസം.പള്ളുരുത്തിയിൽ നിന്നാണ് ലോട്ടറി വിൽപനയ്ക്കായി അദ്ദേഹം മൂവാറ്റുപുഴയിലെത്തുന്നത്.  നഗരത്തിന്റെ പല ഭാ​ഗങ്ങളിൽ കാൽനടയായി എത്തിയാണ് ഷൺമുഖൻ വിൽപ്പന നടത്തുന്നത്. 

ഉയരം കുറവായതിനാൽ കുറെ നേരെ നടന്നാൽ ഇടയ്ക്കിടക്ക് ദണ്ഡനമസ്കാരം ചെയ്യേണ്ടി വരുമെന്ന കുഴപ്പം മാത്രമേയുള്ളൂവെന്നാണ് ഷൺമുഖൻ പറയുന്നത്. ഉയരം കുറവായതിനാൽ കാലുകൾ തമ്മിൽ കൂട്ടിയിടിച്ച് റോഡിൽ കമിഴ്ന്നു വീഴുന്നതിനെയാണ് അദ്ദേഹം ദണ്ഡനമസ്കാരം എന്നു പറയുന്നത്. ഇടയ്ക്കിടെയുള്ള ദണ്ഡനമസ്കാരം മൂലം ദേഹത്ത് പല ഭാഗത്തും മുറിവുകളുണ്ട്. എങ്കിലും ഷൺമുഖൻ ഹാപ്പിയാണ്. തന്നേക്കാൾ ദുരിതം അനുഭവിക്കുന്നരെ കണ്ടാൽ ഒരു ലോട്ടറി ടിക്കറ്റ് ഭാഗ്യപരീക്ഷണത്തിനു സൗജന്യമായി കൊടുക്കാറുണ്ട് ഷൺമുഖൻ.