തിരുവനന്തപുരം: സംസ്ഥാനത്ത് ഇന്ന് ഏറ്റവും കൂടുതൽ കോവിഡ് രോ​​ഗം സ്ഥിരീകരിച്ചത് കോഴിക്കോട് ജില്ലയിൽ. 883 പേർക്കാണ് ഇന്ന് കോഴിക്കോട് രോ​ഗം സ്ഥിരീകരിച്ചത്. തിരുവനന്തപുരത്തെ രോ​ഗ വ്യാപനം കുറവില്ലാതെ തന്നെ തുടരുകയാണ്. തലസ്ഥാനത്ത് ഇന്ന് 875 പേർക്കാണ് രോ​ഗം കണ്ടെത്തിയത്. മുഖ്യമന്ത്രി പിണറായി വിജയൻ വാർത്താ സമ്മേളനത്തിലാണ് ഇക്കാര്യം വ്യക്തമാക്കിയത്. 

മലപ്പുറത്തും സ്ഥിതി അതീവ രൂക്ഷമാണ്. ഇന്ന് 763 പേർക്കാണ് മലപ്പുറത്ത് രോ​ഗം സ്ഥിരീകരിച്ചത്. 

സംസ്ഥാനത്തെ കോവിഡ് പ്രതിദിന കണക്ക് ഇതാദ്യമായി ആറായിരം കടന്ന ദിവസമാണിന്ന്. സ്ഥിതി അതീവ ​ഗുരുതരമാണെന്നു മുഖ്യമന്ത്രി വ്യക്തമാക്കി. ഇന്ന് 6,324 പേർക്ക് കോവിഡ് സ്ഥിരീകരിച്ചതായി മുഖ്യമന്ത്രി പിണറായി വിജയൻ പറഞ്ഞു. 21 പേർ മരിച്ചു. 

ഇന്ന് സമ്പർക്കത്തിലൂടെ 5,321  പേർക്ക് കോവിഡ് സ്ഥീകരിച്ചു. ഉറവിടമറിയാത്ത കേസുകൾ 628 ആണ്. 105 ആരോഗ്യ പ്രവർത്തകർക്ക് രോഗം സ്ഥിരീകരിച്ചതായും മുഖ്യമന്ത്രി പറഞ്ഞു.