കോഴിക്കോട്: ഭര്‍ത്താവ് കഴുത്തറുത്തതിനെ തുടര്‍ന്ന് ഗുരുതരാവസ്ഥയിലായിരുന്ന യുവതി മരിച്ചു. മലപ്പുറം എടക്കര സ്വദേശിനി സെലീനയാണ് മരിച്ചത്. കോഴിക്കോട്ടെ ലോഡ്ജില്‍ വച്ചാണ് സംഭവം. ഭര്‍ത്താവ് അഷ്്‌റഫ് റിമാന്‍ഡിലാണ്.
രണ്ടാം ഭര്‍ത്താവ് അഷ്‌റഫുമായി വഴക്കിട്ട് ഇടയ്ക്കിടെ കോഴിക്കോട്ടെ ലോഡ്ജില്‍ വന്നു താമസിക്കാറുണ്ട് സെലീന. നാല് ദിവസം മുന്‍പ് അങ്ങനെ താമസിക്കാന്‍ എത്തിയതായിരുന്നു. രാത്രി പത്തേമുക്കാലോടെയാണ് അഷ്‌റഫ് സെലീനയുടെ കഴുത്തറുത്തത്. ആദ്യം ജനറല്‍ ആശുപത്രിയിലും പിന്നീട് കോഴിക്കോട് മെഡിക്കല്‍ കോളജ് ആശുപത്രിയിലും പ്രവേശിപ്പിച്ചു.
ഇന്നലെ വൈകിട്ടാണു മരണം സംഭവിച്ചത്. ആത്മഹത്യാ ശ്രമമെന്നായിരുന്നു ആദ്യം കരുതിയത്. പിന്നീട് സെലീന എഴുതി നല്‍കിയ കുറിപ്പിലാണ് കഴുത്തറുത്തത് ഭര്‍ത്താവാണെന്ന് പൊലീസിനു മനസ്സിലായത്.
അഷ്‌റഫിന് സെലീനയെ സംശമാണ്. ഇരുവരും തമ്മില്‍ വഴക്കുണ്ടാവാറുമുണ്ട്. ഇതാകാം കൊലപാതകത്തിനു കാരണമെന്നാണ് പൊലീസ് നിഗമനം. സെലീനയുടെ ബന്ധുക്കളും അഷ്‌റഫിനെതിരെ മൊഴി നല്‍കിയിട്ടുണ്ട്. പ്രതി റിമാന്‍ഡിലാണ്. കസബ പൊലീസാണ് കേസ് അന്വേഷിക്കുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ