കാസര്കോട്: പിണറായി സര്ക്കാരിന് രണ്ടാമൂഴമില്ലെന്ന് പ്രതിപക്ഷ നേതാവ് രമേശ് ചെന്നിത്തല. എല്ലാ തട്ടിപ്പുകളുടെയും പ്രഭവകേന്ദ്രം മുഖ്യമന്ത്രിയുടെ ഓഫീസ് ആണെന്നും ചെന്നിത്തല പറഞ്ഞു. ഐശ്വര്യ കേരള യാത്ര ഉദ്ഘാടന ചടങ്ങില് സംസാരിക്കുകയായിരുന്നു അദ്ദേഹം.
പിണറായി സര്ക്കാരിന്റെ അടുത്ത് അധോലോക കൊളളസംഘങ്ങള് പോലും എത്തില്ല. ഇവരെ കണ്ടാല് ചമ്പല്ക്കാട്ടിലെ കൊളളക്കാര് നമിക്കും. മന്ത്രിമാര്ക്ക് പോലും എത്താന് കഴിയാത്ത മുഖ്യമന്ത്രിയുടെ ഓഫീസിലെ ഇരുമ്പ് കോട്ടയ്ക്കകത്ത് എങ്ങനെയാണ് സ്വപ്ന യഥേഷ്ടം കടന്നു ചെന്നത്. മുഖ്യമന്ത്രിയും പ്രിന്സിപ്പല് സെക്രട്ടറിയും ചേര്ന്ന് കൊളളക്കാര്ക്ക് ഒത്താശ ചെയ്തുകൊടുത്തത് മറക്കാറായിട്ടില്ലെന്നും ചെന്നിത്തല പറഞ്ഞു.
പിണറായി വിജയന് എന്ന ഏകാധിപതിയുടെ ഭരണം ഇനി കേരളത്തിന് താങ്ങാന് കഴിയില്ല. ആട്ടിന് തോലിട്ട ചെന്നായ്ക്കളെ പോലെ നാടുമുഴുവന് നടന്ന് വര്ഗീയത പറയുകയാണ് സിപിഎം. മുഖ്യമന്ത്രി തീക്കൊളളികൊണ്ട് തലചൊറിയുകയാണ്. കേരളത്തില് വര്ഗീയ ആളിക്കത്തിക്കാനാണ് ശ്രമം. ഈ വര്ഗീയതക്കെതിരെയാണ് യു.ഡി.എഫിന്റെപോരാട്ടം.
നമ്മുടെ ദൗത്യം വളരെ വലുതാണ് കേരളത്തെ മോചിപ്പിക്കന് വേണ്ടയുളള ദൗത്യമാണ് അത്. 35 രാഷ്ട്രീയ കൊലപാതകങ്ങള് നടന്ന മണ്ണാണ് ഇത്. നാല് ലോക്കപ്പ് കൊലപാതകങ്ങള്, 7 മാവോയിസ്റ്റുകളെ വെടിവെച്ചുകൊലപ്പെടുത്തി. മാര്ക്സിസ്റ്റുകാര്ക്കല്ലാതെ മറ്റാര്ക്കും നീതി കിട്ടാത്ത ഭരണകാലമായിരുന്നു ഇതെന്നും ചെന്നിത്തല പറഞ്ഞു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ