തിരുവനന്തപുരം: തുടർ ഭരണം ലഭിച്ചത് എൽഡിഎഫ് പ്രവർത്തകർ ദീപം തെളിയിച്ച് ആഘോഷിച്ചപ്പോൾ അതേ ദിവസം തന്നെ കൈയിൽ ദീപമേന്തി നിൽക്കുന്ന ചിത്രം പങ്കിട്ട് മുതിർന്ന ബിജെപി നേതാവും മുൻ നേമം എംഎൽഎയുമായ ഒ രാജഗോപാൽ. സാമൂഹിക മാധ്യമത്തിൽ പങ്കിട്ട ചിത്രം കണ്ട് ചിലരെങ്കിലും അമ്പരന്നു. എന്നാൽ ചിത്രത്തിന് മുകളിൽ നൽകിയിരിക്കുന്ന ഹാഷ്ടാഗുകൾ കണ്ടപ്പോഴാണ് പലർക്കും സംഗതി മനസിലായത്.
ബംഗാളിലെ അക്രമങ്ങളിൽ പ്രതിഷേധിച്ചാണ് അദ്ദേഹം ചിത്രം പങ്കുവച്ചത്. ബംഗാൾ വയലൻസ്, സേവ് ബംഗാൾ എന്നീ ഹാഷ്ടാഗുകളാണ് ചിത്രത്തിന് നൽകിയത്.
അതേസമയം ബിജെപി ഇത്തരത്തിലൊരു പ്രതിഷേധത്തിന് ആഹ്വാനം ചെയ്തിട്ടില്ലന്ന് അണികൾ കമൻറ് ബോക്സിൽ അറിയിച്ചു. എൽഡിഎഫിന്റെ വിജയാഘോഷം നടക്കുമ്പോൾ തന്നെ ദീപം തെളിച്ച ചിത്രം പങ്കുവച്ചതും സൈബർ ഇടങ്ങളിൽ വലിയ ചർച്ചകൾക്കാണ് തുടക്കമിട്ടിരിക്കുന്നത്.
ദീപം തെളിച്ചും പൂത്തിരി കത്തിച്ചും മധുരം വിതരണം ചെയ്തുമാണ് ഇടതു തുടർ ഭരണത്തിന്റെ വിജയാം പ്രവർത്തകർ ആഘോഷിച്ചത്. കോവിഡ് മാനദണ്ഡങ്ങൾ നിലനിൽക്കുന്നതിനാൽ വീടുകളിലും പാർട്ടി ഓഫീസുകളിലും വളരെക്കുറച്ച് ആളുകളെ മാത്രം പങ്കെടുപ്പിച്ചാണ് വിജയാഘോഷം നടത്തിയത്. മുഖ്യമന്ത്രി പിണറായി വിജയൻ ക്ലിഫ് ഹൗസിൽ വച്ചാണ് വിജയ ദിനം ആഘോഷിച്ചത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ