ആലപ്പുഴ: ലോക്ക്ഡൗൺ നിയന്ത്രണങ്ങൾ ലംഘിച്ച് ക്രിക്കറ്റ് കളിച്ച സംഘത്തെ പൊലീസ് പിടികൂടി. ശിക്ഷയായി സംഘത്തിന് സാമൂഹിക സേവനമാണ് പൊലീസ് നൽകിയത്. 

ഹരിപ്പാടിന് സമീപം മഹാദേവികാട് പുളിക്കീഴ് ജംഗ്ഷനിലാണ് സംഭവം. നിയന്ത്രണങ്ങൾ ലംഘിച്ച് ക്രിക്കറ്റ് കളിച്ച് ഏഴ് പേരെയാണ് തൃക്കുന്നപ്പുഴ പൊലീസ് കഴിഞ്ഞ ദിവസം പിടികൂടിയത്. 

ശിക്ഷയായി ഇവർക്ക് ഒരു ദിവസത്തെ സാമൂഹിക സേവനമാണ് പൊലീസ് നൽകിയത്. സ്റ്റേഷനു സമീപം നടത്തുന്ന പൊലീസ് പരിശോധനയിൽ പങ്കെടുത്ത് മാസ്ക് ഉപയോഗിക്കേണ്ടതിന്റേയും സാമൂഹിക അകലം പാലിക്കേണ്ടതിന്റേയും ആവശ്യകതകൾ പറഞ്ഞ് ആളുകളെ ബോധവത്കരിക്കുകയായിരുന്നു സംഘത്തിന്റെ ദൗത്യം.