കണ്ണൂർ: സംസ്ഥാനത്ത് മദ്യശാലകൾ തുറക്കേണ്ട സമയമായിട്ടില്ലെന്ന് മന്ത്രി എംവി ​ഗോവിന്ദ​ൻ. ബെവ്ക്യൂ വഴി മദ്യം വിൽക്കാൻ നിലവിൽ ആലോചനയില്ലെന്നും അദ്ദേഹം പറഞ്ഞു. 

മദ്യശാലകൾ തുറക്കുന്ന കാര്യം കോവിഡ് വ്യാപന സാഹചര്യങ്ങൾ നോക്കി പിന്നീട് തീരുമാനിക്കും. സാമൂഹിക അകലം പാലിച്ച് മദ്യം വിൽക്കാൻ കഴിയുമോയെന്നാണു ചിന്തിക്കുന്നതെന്നും മന്ത്രി വ്യക്തമാക്കി. 

ന്യൂനപക്ഷ സംവരണാനുപാത വിഷയത്തിൽ ഹൈക്കോടതി വിധി അംഗീകരിക്കുമെന്നും അദ്ദേഹം മാധ്യമങ്ങളോടു പറഞ്ഞു. തദ്ദേശ സ്വയംഭരണ സ്ഥാപനങ്ങൾ വഴി പുതിയ തൊഴിലവസരങ്ങൾ സൃഷ്ടിക്കും. 

ഇടതു മുന്നണി അംഗങ്ങളിൽ ചിലർ ദൈവ നാമത്തിൽ സത്യപ്രതിജ്ഞ ചെയ്തതിൽ ആർക്കും ഉത്കണ്ഠ വേണ്ട. വിശ്വാസികൾക്ക് അവരുടെ രീതിയിൽ സത്യപ്രതിജ്ഞ ചെയ്യാൻ ഭരണഘടനാപരമായി അവകാശമുണ്ടെന്നും ഗോവിന്ദൻ കൂട്ടിച്ചേർത്തു.