വളാഞ്ചേരി: പത്താം ക്ലാസ് പരീക്ഷയിൽ തോൽവി നേരിട്ട കുട്ടികൾക്കായി വിനോദയാത്ര. വളാഞ്ചേരിക്കടുത്ത് മാറാക്കര പഞ്ചായത്താണ് കുട്ടികളെ സന്തോഷിപ്പിക്കാനായി വിനോദ യാത്രയ്ക്ക് കൊണ്ടുപോകുന്നത്. 'ജയിക്കാനായി തോറ്റവർക്കൊപ്പം' എന്ന പേരിലാണ് മാറാക്കര പഞ്ചായത്തിന്റെ പദ്ധതി. 

എസ്എസ്എൽസി പരീക്ഷയിൽ പരാജയപ്പെട്ടവരേയും കൊണ്ട് ഒരു ദിവസത്തെ വിനോദയാത്രയാണ് സംഘടിപ്പിക്കുന്നത്. വെങ്ങാടുള്ള വാട്ടർതീം പാർക്കിലേക്കാണ് യാത്ര. പിന്നാലെ കുട്ടികൾക്ക് മനഃശാസ്ത്രജ്ഞരുടെ നേതൃത്വത്തിൽ കൗൺസലിങ് നൽകും. മാനസികപിരിമുറുക്കവും നിരാശാബോധവും കുറയ്ക്കാൻ പ്രത്യേക ഗെയിമുകളും കുട്ടികൾക്കായി ഒരുക്കും. 

വാർഡ് അംഗങ്ങളുടെ നേതൃത്വത്തിലാണ് കുട്ടികൾ ആരൊക്കെയെന്ന് കണ്ടെത്തുക. കുട്ടികളുടെ പേര് വിവരങ്ങൾ പരസ്യപ്പെടുത്തില്ല. പരിപാടിയുടെ ചിത്രങ്ങളും പുറത്തുവിടില്ല. 20 വാർഡുകളാണ് മാറാക്കര പഞ്ചായത്തിലുള്ളത്. മാറാക്കര പഞ്ചായത്തിലുള്ള കുട്ടികൾക്കു മാത്രമാണ് അവസരം. 

ഈ വാര്‍ത്ത കൂടി വായിക്കൂ

അഞ്ചു രൂപയ്ക്ക് എത്രദൂരം വരെയും യാത്ര ചെയ്യാം; കൊച്ചി മെട്രോയില്‍ ഇന്ന് പ്രത്യേക ഓഫര്‍

സമകാലിക മലയാളം ഇപ്പോള്‍ വാട്ട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ