ഇസ്ലമാബാദ് : ഈ മാസം അവസാനിക്കുന്നതിന് മുമ്പ് തന്നെ സ്വത്ത് വിവരങ്ങൾ വെളിപ്പെടുത്താൻ രാജ്യത്തെ ജനങ്ങളോട് ആഹ്വാനം ചെയ്ത് പ്രധാനമന്ത്രി ഇമ്രാൻ ഖാൻ.  അടുത്ത വർഷത്തേക്കുള്ള സാമ്പത്തിക ബജറ്റ് അവതരിപ്പിക്കുന്നതിന് മുമ്പായി നടത്തിയ പ്രസം​ഗത്തിലാണ് ഇമ്രാൻ ഖാന്റെ ആഹ്വാനം. ജനങ്ങൾ സ്വത്ത് വിവരങ്ങൾ വെളിപ്പെടുത്തി നികുതി അടയ്ക്കാൻ തയ്യാറായാൽ മാത്രമേ രാജ്യം പുരോ​ഗതി പ്രാപിക്കുകയുള്ളൂവെന്നും അദ്ദേഹം പറഞ്ഞു. ലോകരാജ്യങ്ങളുടെ നിരയിലേക്ക് പാകിസ്ഥാനെ എത്തിക്കണമെങ്കിൽ ജനങ്ങളുടെ അകമഴിഞ്ഞ സഹായം ആവശ്യമാണെന്നും ഇമ്രാൻഖാൻ കൂട്ടിച്ചേർത്തു. 

ബിനാമി അക്കൗണ്ടുകളിലെ സമ്പാദ്യത്തിന്റെ വിവരവും ബിനാമി ആസ്തികളും വെളിപ്പെടുത്തണമെന്നും വിദേശ നിക്ഷേപത്തിന്റെ വിവരങ്ങൾ സർക്കാരിൽ സമർപ്പിക്കണമെന്നും അദ്ദേഹം ആവശ്യപ്പെട്ടു. ജൂൺ 30 കഴിഞ്ഞാൽ സർക്കാർ കർശന നടപടികളിലേക്ക് കടക്കുമെന്നും പിന്നീട് ഒരവസരം ഉണ്ടായിരിക്കുന്നതല്ലെന്നും ഇമ്രാൻഖാൻ വ്യക്തമാക്കി. വിദേശരാജ്യങ്ങളിൽ പാക് പൗരൻമാർക്കുള്ള നിക്ഷേപത്തിന്റെ കണക്ക് എടുക്കുന്നതിനുള്ള നടപടികൾ പുരോ​ഗമിക്കുകയാണ്. 

രഹസ്യമായി സൂക്ഷിച്ചിരിക്കുന്ന സ്വത്ത് വിവരങ്ങൾ വെളിപ്പെടുത്തി നിയമവിധേയമാക്കുന്നതിനുള്ള നടപടിക്ക് മെയ് മാസമാണ് ഇമ്രാൻ സർക്കാർ തുടക്കമിട്ടത്. രാഷ്ട്രപതിയുടെ ഓർഡിനൻസ് വഴിയാണ് ഇത് നടപ്പിലാക്കിയത്. പദ്ധതി അനുസരിച്ച് 45 ദിവസമാണ് ജനങ്ങൾക്ക് നികുതി അടയ്ക്കുന്നതിനായും സ്വത്ത് വിവരങ്ങൾ വെളിപ്പെടുത്തുന്നതിനായും അനുവദിച്ച സമയം.