സന്തോഷ് കീഴാറ്റൂർ ട്രാൻസ്ജെൻഡറായി എത്തുന്ന ‘അവനോവിലോന’യുടെ ഫസ്റ്റ് ലുക്ക് പോസ്റ്റർ പുറത്ത്. മോഹൻലാലാണ് പോസ്റ്റർ പുറത്തുവിട്ടത്. ഷെറി, ദീപേഷ് എന്നിവരാണ് ചിത്രത്തിന്റെ സംവിധാനം. ഈ ചിത്രത്തിലൂടെ സന്തോഷ് കീഴാറ്റൂർ ആദ്യമായി നിർമാതാവാകുന്നു എന്ന പ്രത്യേകതയുമുണ്ട്. അരങ്ങിലും അണിയറയിലും നിറഞ്ഞു നിൽക്കുന്ന ട്രാൻസ്ജെൻഡർ കലാകാരന്മാരാണ് ചിത്രത്തിന്റെ പ്രത്യേകത.
പാവാടയും ബ്ലൗസുമിട്ട്കയ്യിൽ ഒരു ബാഗുമായി നിൽക്കുന്ന സന്തോഷ് കീഴാറ്റൂരാണ് പോസ്റ്ററിൽ. സമൂഹത്തിൽ ട്രാൻസ്ജെൻഡർമാർ അഭിമുഖീകരിക്കുന്ന പ്രതിസന്ധികളെ അവതരിപ്പിക്കുകയാണ് ചിത്രത്തിലൂടെ. സംവിധായകരായ ഷെറി, ദീപേഷ് എന്നിവർ ചേർന്നു നടത്തിയ ഒരു പഠനം തന്നെയാണ് അവനോവിലോന. ഏതാണ്ട് 8 വർഷത്തോളം ഈ കഥയ്ക്കു പിന്നാലെയായിരുന്നു എന്നാണ് ഇവർ പറയുന്നത്. പൊതുജനങ്ങൾക്കിടയിൽ ട്രാൻസ്ജെൻഡർമാർ എങ്ങനെ വിലയിരുത്തപ്പെടുന്നുവെന്നും അവർ എങ്ങനെ അത് അതിജീവിക്കുന്നുവെന്നും ഈ സിനിമ വരച്ചിടുന്നുവെന്നും ദീപേഷ് വ്യക്തമാക്കി.
കണ്ണൂർ, കാസർകോട് ജില്ലകളിൽ നിന്നുള്ള പത്തിലേറെ ട്രാൻസ്ജെൻഡേഴ്സ് സിനിമയുടെ ഭാഗമാകുന്നു. കാസർകോട് സ്വദേശിനി വർഷ ജിത്തു നീലേശ്വരമാണ് സിനിമയുടെ അസിസ്റ്റന്റ് ഡയറക്ടർ. ട്രാൻസ്ജെൻഡർമാരായ റിയ ഇഷ കോസ്റ്റ്യൂംസും മണിക്കുട്ടി മേക്കപ്പും ചെയ്യുന്നു. രവീണ, ലാവണ്യ, കാർത്തിക, വാണി, ലിജ ലൈജു, കൃഷ്ണേന്ദു, സിതാര, സിനി തുടങ്ങിയ ട്രാൻസ് താരങ്ങളാണ് ചിത്രത്തിൽ അഭിനയിക്കുന്നത്. ആത്മീയ, കെ.സി.കൃഷ്ണൻ എന്നിവരും ചിത്രത്തിൽ അഭിനയിക്കുന്നുണ്ട്. 18 ദിവസം കൊണ്ടു കണ്ണൂർ, ബർണശ്ശേരി എന്നിവിടങ്ങളിലാണ് അവനോവിലോനയുടെ ഷൂട്ടിങ് പൂർത്തിയാക്കിയത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
